Ministru Obras Públika, Salvador Eugénio Soares dos Reis Pires bainhira halo intervensaun iha Asia Clean Energy Forum (ACEF) iha Manila. Imajen Midia-MOP

DILI, 18 juñu 2019 (TATOLI) – Ministru Obras Públika, Salvador Eugénio Soares dos Reis Pires akompaña husi Diretora Jerál Eletrisidade Timor-Leste (EDTL) Arlinda M. Miranda partisipa iha Asia Clean Energy Forum (ACEF) ne’ebé realiza Manila, Filipina hahú loron 17 to’o 21 juñu.

Forum ne’e realiza husi Banku Dezenvolvimentu Aziátiku (ADB-sigla inglés) no hetan partisipasaun husi nasaun membru hamutuk 54 inklui organizasaun internasionál sira.

Durante intervensaun governante ne’e informa agora daudauk Timor-Leste iha sentrál elétrika rua (Hera no Betano) mak opera hela no tuir dadus iha tinan 2016, Timor-Leste kontribui de’it 0,003% ba emisaun globál, maske nune’e Governu iha kompromisu atu redús.

“Timor-Leste iha commitment atu redús emisaun liu-hosi atividade no setór oin-oin, partikularmente iha setór enerjia,” tenik Ministru Salvador Pires iha ACEF, tersa ne’e,tuir informasaun TATOLI asesu iha mídia MOP.

Hodi dehan tan, Governu iha ona planu hadi’a sentrál elétriku balun hodi bele uza gás naturál iha tempu badak no dezenvolve sistema adisionál hanesan Liquefied Natural Gas (LNG) ki’ik ida hodi bele iha redusaun kustu produsaun to’o 75%.

Nune’e mós iha tinan ne’e, Governu sei halo estudu viabilidade ida ba bee-matan hodi bele inkorpora potensiál ba planu enerjia idrelétriku ho kapasidade Mega Watt 50 ho investimentu entre millaun $250 to’o 300.

“Ida ne’e ezemplu husi investimentu sustentável ba enerjia moos, partikularmente enerjia renovável ba bee-matan (idrelétrika), anin (eólika) no loron matan (solár) iha Timor-Leste, ne’ebé hanesan papel importante atu atende nesesidade enerjia no ekonomia nasaun, nune’e mós ajuda Timor-Leste kumpre ninia obrigasaun iha konvensaun sira kona-ba alterasaun klimátika,” hateten governante ne’e.

Iha biban ne’e, nia mós dehan Governu Timor-Leste agora daudauk iha prosesu halo reforma ba Eletrisidade de Timor-Leste (EDTL) sai Empreza Públika, nune’e instituisaun ne’e bele jere di’ak retornu ho efisiénsia no iha sustentabilidade ekonomia.

“Reforma ne’e konsentra iha estabelesimentu estrutura legal no regulamentu nesesáriu, hanesan polítika no padraun ne’ebé relasiona ho utilizasaun enerjia no instalasaun ekipamentu eletrisidade”.

Governante ne’e mós afirma Governu iha hanoin atu reforma polítika enerjia eletrisidade hodi bele loke espasu ba investimentu no fornese opsaun ba enerjia ne’ebé moos ho kustu natoon iha tempu badak no médiu nia laran, inklui opsaun ba uzu gás naturál ka fonte seluk ne’ebé hanesan kombustivel.

“Dezenvolve sistema enerjia renovável no produsaun eletrisidade ho idroelétrika, solar, bio-enerjia no anin iha tempu naruk,” dehan nia.

Nia informa, Timor-Leste hanesan nasaun trópiku ne’ebé iha rekursu renovável exepsionál, hanesan enerjia solár, anin, ídrika no bio-enerjia. Nu’udar nasaun ki’ik ida, Timor-Leste potensiál atu halo tranzisaun ba dezenvolvimentu enerjia renovável ho kualidade.

Nia dehan Governu Timor-Leste iha kompromisu atu fornese infraestrutura bázika ne’ebé integrada, kualidade, seguru no sustentável hodi promove dezenvolvimentu sósiu-ekonómiku no sósiu-kulturál país ba benefísiu sidadaun, espesífikamente ba feto, labarik, idozu no ema ho defisiénsia fízika.

“Iha prosesu dezenvolvimentu komponente infraestrutura, ami iha esperansa bele hadi’a kualidade vida, asesu ba fasilidade, insentivu ba kreximentu ekonómiku no kriasaun empregu” tenik Ministru Salvador Pires iha ACEF Manila, tersa ne’e.

Nia akresenta, Governu mós kontinua esplora posibilidade interligasaun entre Timor-Leste no Timor Osidentál, Indonézia.

Iha aprezentasaun ne’e, nia mós afirma katak Governu sei kontinua programa eletrifikasaun iha nível nasionál no rurál, ba instalasaun liña distribuisaun no enerjia solar ne’ebé agora daudauk falta 17% mak seidauk hetan asesu, hodi bele garante asesu eletrisidade 24 horas iha loron ida.

Hodi dehan tan, agora daudauk Governu hahú ona troka infraestrutura tuan husi tempu okupasaun Portugal no Indonézia, nune’e bele otimiza sistema distribuisaun ba fornesimentu ne’ebé di’ak no efikásia.

Entretantu iha forum ne’e, espesialista sira ba asuntu enerjia moos fahe informasaun kona-ba enerjia renovável no espesialista balun mós fahe esperiénsia kona-ba dezenvolvimentu enerjia eletrisidade iha paíss sira no aprezenta mós kona-ba Revitalizasaun, Planu Urbanu, bee, estrada no seluk tan.

Jornalista       : Julia Chatarina

Editór             : Rafy Belo 

HAKEREK NO HATÁN

Please enter your comment!
Please enter your name here