Sekretáriu Estadu Juventude no Desportu, Nélio Isaac Sarmento. Imajen António Gonçalves

DILI, 18 juñu 2019 (TATOLI)—Governu liuhosi Sekretaria Estadu Juventude no Desportu (SEJD), sei forma ekipa Task Force hodi akompaña preparasaun kada modalidade ne’ebé atu partisipa eventu Sea Games, iha Manila, Filipina.

Jogu iha Sudeste Aziátika ne’ebé hala’o iha Filipina ne’e sei hahú iha loron 30 novembru no ramata iha 11 dezembru 2019.

“Semana ida ne’e ha’u sei harii komisaun oan ida, ha’u bolu naran ekipa Task Force ida atu akompaña kona-ba preparasaun antes entrega ba Komité Olímpiku atu ba Sea Games,” Sekretáriu Estadu Juventude no Desportu, Nélio Isaac Sarmento, ba jornalista sira iha edifísiu RTTL, Caicoli, ohin.

Nia dehan, preparasaun ne’e governu sei tau matan, nune’e bele hatudu prestasaun di’ak iha eventu internasionál ne’e.

Federasaun ne’ebé partisipa iha Sea Games ne’e mak hanesan Atletizmu, Boxe, Siklizmu, Futeból, Tenis-kampu, Tiru, Taekwondo, Natasaun, Karatedo, Silat Natasaun, Alterufilizmu no Voleiból.

“Orsamentu ba eventu ne’e hamutuk rihun 100. Iha posibilidade ita bele suporta tan orsamentu rihun $200. Totál orsamentu atu arranka ba Manila (Filipina) ne’e iha rihun $350. Preparasaun ita fó atensaun ba konfederasaun sira, maibé preparasaun tinan ida ne’e la hanesan tinan uluk. Preparasaun ita fó responsabilidade ba konfederasaun sira,” Nélio esplika.

Nia rekoñese, federasaun balun nia preparasaun di’ak ona, hanesan selesaun ba atleta sira la’o di’ak, oras ne’e preparasaun hahú la’o dadaun.

“Preparasaun ne’e responsabilidade tomak iha federasaun, maibé Konfederasaun Desportiva Timor-Leste (CDTL-sigla portugés) sei akompaña. Osan governu mak suporta. Iha mós ekipa ida tan ne’ebé mai hosi Gabinete Sekretáriu Estadu nian mak akompaña, evalua kona-ba serbisu ne’ebé mak CDTL halo no mós ba federasoens sira ne’ebé potensiál,” eis Sekretáriu Estadu Komunikasaun Sosiál ne’e informa.

Jornalista: Evaristo Soares Martins

Editór: Xisto Freitas

Lee mós notísia ne’e: http://www.tatoli.tl/2019/05/atleta-43-sei-partisipa-sea-games-iha-filipina/

 

HAKEREK NO HATÁN

Please enter your comment!
Please enter your name here