Ilustrasaun inflasaun. Imajen/Espesiál

DILI, 18 juñu 2019 (TATOLI) – Ministériu Finansa (MF) liu-hosi Diresaun Jerál Estatístika Ekonomia no Sosiál aprezenta relatóriu Índise Presu Konsumidór (IPK) ba fulan maiu ne’ebé tuir persentajen iha inflasaun (sa’e) +0,1% kompara ho  fulan abril 2019.

Persentajen ne’e sa’e tanba hetan kontribuisaun maioria husi grupu hahán no bebida naun-alkólika (+0,1%), Transporte (+0,6%), no Ekipamentu no Manutensaun Mobiliáriu Uma Laran (+0,4%).

Grupu Alkohol no Tabaku (-0,1%) no ba Uma (-0,3%) sai hanesan mudansa kontráriu ba inflasaun grupu hotu. Grupu Hahán no Bebida Naun- Alkólika sa’e hetan impaktu maioria husi sub-grupu Vejetál sira (+1,5%), Ikan no Hahán Tasi (+0,2%), no Frutas (+0,2%).

Sub-grupu Foos (-0,2%), Naan (-0,6%), Paun no Trigu (Esklui Foos) (-0,4%) no Masin Midar, Marmelada, Bani-been, Chocolate no Confectionery (-0,2%) sai hanesan mudansa kontráriu ba grupu Hahán no Bebida Naun- Alkólika.

“Presu foos tun iha fulan ida ne’e afeta husi presu foos importasaun ne’ebé hatudu iha presu foos mundiál tun 5% iha trimestrál ikus fulan maiu tinan 2019. Iha parte seluk, presu mina internasionál sa’e 9% iha trimestrál ikus fulan maiu tinan 2019 hodi afeta presu mina transporte iha rai laran,” refere relatóriu IPK divulgadu iha pájina MF, Ajénsia TATOLI asesu, tersa ne’e.

Enkuantu mudansa  persentajen IPK anuál sa’e (+0,8%) kompara maiu 2019  to’o maiu 2018, ne’ebé hetan kontribuisaun husi grupu Hahán no Bebida Naun-Alkólika (+0,7%), Alkohol no Tabaku (+2.,%), Edukasaun (+9,0%), Transporte (+1,7%), Uma (+0,8%),  Roupa no Sapatu (+0,2%).

Nune’e mós ba ekipamentu no Manutensaun Mobiliáriu Uma Laran (-0,4%), Komunikasaun (0,2%), no Rekreasaun no Kultura (-0,2%) sai hanesan mudansa kontráriu ba anuál maiu 2019.

Inflasaun Tradable (+0,1%) sa’e no Naun-Tradeable (+0,1%) sa’e iha mensál kompara maiu 2019 to’o abril 2019 , enkuantu Inflasaun Tradable (-0,3%) tun no Naun-Tradeable (+0,2%) sa’e iha anuál kompara maiu 2019 to’o maiu 2018.

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here