Ministru Negósius Estranjeirus no Kooperasaun (MNEK), Dionísio da Costa Babo Soares Hamutuk ho Embaixadór Japan iha Timor-Leste, Hiroshi Minami “Seremonia Asina Akordu Projetu Bolsu Estudu Dezenvolvimento Rekursu Umanu (JDS)”, iha Salaun Instituto Diplomata MNEC Praia dos Qoqeiros Dili, Tersa,18/06/2019). Imajen/Egas Cristovão

DILI, 18 juñu 2019 (TATOLI)Governu Timor-Leste liuhusi Ministériu Negósiu Estranjeiru no Kooperasaun (MNEK) asina akordu ho Embaixada Japaun iha Timor-Leste kona-ba Bolsa Estudu JDS (Japan Development Scholarship) hodi oferese ba funsionáriu públiku sira iha Timor-Leste (TL).

Objetivu husi asina akordu bolsa estudu ne’e mak atu hametin liután relasaun entre Timor-Leste ho Japaun hodi apoiu dezenvolvimentu rekursu umanu liuliu funsionáriu públiku foin-sa’e sira iha Timor-Leste. Nune’e sei halo formulasaun no implementasaun ba planu dezenvolvimentu sosiál no ekonomia atu bele sai lider di’ak iha futuru.

“Akordu ohin ne’e mai husi asinatura akordu tinan kotuk, hafoin Ministru Negósiu Estranjeiru Japaun Taro Kono vizita mai iha ne’e. Ne’ebé, Governu Japaun oferese bolsa ualu ba funsionáriu públiku sira no prosesu selesaun ne’e hala’o husi INAP hodi ba eskola iha área oioin hanesan Administrasaun Públika, Dezenvolvimentu Rurál, Infraestrutura, área Indústria no seluk,” informa Ministru Negósiu Estranjeiru no Kooperasaun, Dionísio Babo Soares ba jornalista sira iha nia Knaar fatin, Praia dos Coqueiros, tersa (18/06).

Ministru Dionísio Babo informa katak kursu sira ne’e ba nivel mestradu no nia selesaun sei rigorozu tebes. “Agora INAP tenke prepara duni ema ne’ebé iha kapasidade duni, la’ós domina iha língua de’it maibé tenke iha koñesimentu, tenke iha background ne’ebé forte tanba ita presiza atu halo tan dezenvolvimentu ba ita-nia rai di’ak liu tan ba oin”.

Ministru informa tan katak totál ema ne’ebé sei partisipa iha estudu ne’e hamutuk na’in ualu nune’e akordu ne’e komesa 2019 ne’e no sei to’o 2022. Selesaun agora daudauk hala’o hela maibé sei hahú ho funsionáriu públiku uluk.

Funsionáriu sira ne’ebé mak sei ba eskola sei ba husi instituisaun estadu no fila mai tama kedas serbisu nune’e sira ne’ebé ba privadu, mai tenke kompete ho sira seluk.

“Estadu kria fasilidade mas ita maka tenke esforsu para tama iha ne’ebá. Timoroan hotu mai sempre iha serbisu maibé labele hein de’it estadu maka halo serbisu, serbisu iha área oioin, iha setór privadu makas tebes, estadu mós iha, ONG mós iha, iha area oioin”.

“Ne’ebé, ita komprende iha tinan balun liu ba iha defisiénsia balun maibé ba oin ne’e ita tenke hola inisiativa para halo mudansa ba ida ne’e,” kompromete diplomata timoroan ne’e.

Iha fatin hanesan, Embaixadór Japaun ba Timor-Leste, Hiroshi Minami hateten, dezenvolvimentu ba rekursu umanu importante tebes iha Timor-Leste tanba ne’e nia haksolok partisipa iha serimónia asina akordu entre Timor-Leste ho Japaun.

“Ha’u haksolok partisipa iha serimónia ida ne’e, serimónia asinatura entre Governu Timor-Leste ho Governu Japaun, ne’ebé maka joven sira husi ministériu sira iha Governu Timor- Leste bele iha edukasaun no hala’o estudu iha Japaun nia universidade”.

Diplomata japonés ne’e relembra, tinan kotuk bainhira MNEK Japaun Taro Kono vizita Timor-Leste hala’o ona serimónia asina akordu ba dahuluk entre Timor-Leste ho Japaun. Akordu ida agora ne’e ba daruak nian.

“Ha’u espera katak joven sira husi Timor-Leste bele iha edukasaun iha universidade Japaun, tanba ha’u fiar katak dezenvolvimentu rekursu umanu maka setór importante ba dezenvolvimentu iha Timor-Leste,” konsidera Embaixadór Hiroshi Minami.

Lee mós notísia: http://www.tatoli.tl/2019/03/japaun-liuhosi-programa-jds-fo-bolsu-estudu-ba-funsionariu-publiku/

http://www.tatoli.tl/2018/10/japaun-kompromete-kontinua-apoiu-tl/

Jornalista       :Nelia Rosario

Editór             : Rafy Belo

HAKEREK NO HATÁN

Please enter your comment!
Please enter your name here