Prezidente Repúblika, Francisco Guterres Lú Olo, inaugura Aeroportu Internasionál Oe-Cusse "Rota do Sândalo", Tersa (18/6/2019). Imajen/ZEESM

OE-CUSSE, 18 juñu 2019 (TATOLI) – Iha serimónia inaugurasaun Aeroportu Internasionál Oe-Cusse “Rota do Sândalo”, ohin, la duun fó ksolok ba Prezidente Autoridade Rejiaun Administrativu Espesiál Oe-Cusse Ambeno (RAEOA), Mari Alkatiri, tanba nia ‘irmão’ Xanana Gusmão, la hola parte iha serimónia importante no istóriku ne’e.

Konvidadu importante sira ho mós Prezidente Autoridade RAEOA, Mari Alkatiri, akompaña Prezidente Repúblika, Francisco Guterres Lú Ola iba serimonia inaugurasaun Aeroportu Internasionál Oe-Cusse “Rota do Sândalo”, Tersa (18/6/2019). Imajen/ZEESM

Aeroportu Internasionál Oe-Cusse ne’ebé hahú nia konstrusaun iha tinan 2018, ohin, inaugura ona hosi Prezidente Repúblika, Francisco Guterres Lú Olo, ne’ebé akompaña hosi Prezidente Parlamentu Nasionál, Arão Noe de Jesus Amaral, Prezidente Tribunál Rekursu, Deolindo dos Santos, Prezidente Autoridade RAEOA, Mari Alkatiri, Ministru Reforma Lejizlativa no asuntu Parlamentár,  Fidelis Leite Magalháes, Ministru Transporte no Komunikasaun, José Agustnho  da Silva, ne’ebé asiste mós hosi konvidadu internasionál, korpu diplomátiku, no konvidadu nasionál  sira seluk.

Inaugurasaun aeroportu “Rota do Sândalo” ne’e hodi komemora mós aniversáriu ba dala-lima kriasaun Rejiaun Administrativu Espesiál Oe-Cusse Ambeno (RAEOA), ne’e partisipa mós hosi membru Parlamentu Nasionál, Xefe Estadu Maiór Jenerál FALINTIL-Forsa Defeza Timor Leste (F-FDTL), Majór Jenerál, Lere Anan Timur, eis Prezidente Repúblika, José Ramos-Horta, Prokuradór Jerál Repúblika, José da Costa Ximenes.

Aeroportu “Rota do Sândalo” nia kustu obra purvolta millaun $120 ne’e konstrui hosi empreza Wijaya Karya, Tbk (WIKA) hosi Indonézia, ho nia  naruk pista metru 2.200, inklui ho nia fasilidade ho kualidade aeroportu internasionál.

“Ohin, ha’u laran triste tanba hau nia irmaun  Xanana Gusmão la iha ne’e. Maske nia bele la iha, maibé nia iha fatin ne’ebé de’it bele akompaña transmisaun direita,” afirma Mari Alkatiri iha nia intervensaun iha ámbitu inaugurasaun aeroportu “Rota do Sândalo”.

“Primeiru-Ministru, Taur Matan Ruak, ha’u koñese nia didi’ak, maibé ita tenke hateke ba oin, hanoin ba kotuk, maibé labele la’o ba kotuk no hanoin ba kotuk hodi hateke nafatin ba oin,” tenik Mari Alkatiri.

Prezidente Autoridade RAEOA hateten,  loron 18 juñu,  inaugura aeroportu ho naran “Rota do Sândalo” razaun fó naran ne’e tanba Europeu sira mai  rejiaun Oe-Cusse tanba sândalo, sira mai la’ós buka de’it sândalo, maibé hakarak mós ho seda, sira presiza seda tanba fó valór tebes. Se maka na’in ba seda maka Xina, maibé sira mós fó valór ba ai-kameli, entaun movimentu rua ne’e buka sândalo atu troka ho seda, se iha rota no seda signifika tenke iha rota do sândalo. Ida ne’e maka razaun fó naran aeroportu Rota do Sândalo.

Mari Alkatiri garante katak, Aeroportu Rota do Sândalo sei sai janela ka odamatan atu hametin pás no estabilidade entre Timor-Leste ho Indonézia. No atu rezolve asuntu fronteira terrestre no marítima tanba aumenta konetividade ba rejiaun no ba mundu.

“Ho dinámika dezenvolvimentu ida ne’e sei hametin relasaun entre ita ho Indonézia,”  hateten Mari Alkatiri.

Mari Alkatiri agradese ba lideransa sira, hahú hosi Xanana Gusmão, Ramos Horta, Lu-Olo, Taur Matan Ruak no povu tomak nia kolaborasaun fó dalan ba RAEOA atu halo prosesu ne’e.

“Ha’u fiar katak prosesu dezenvolvimentu ne’e ita sei presiza nafatin hodi kontinua,” tenik Mari Alkatiri.

 Jornalista        : Zezito Silva

Editór              : Francisco Simões

HAKEREK NO HATÁN

Please enter your comment!
Please enter your name here