Segundu Komandante Polisia Munisípiu Dili, Superintendete Asistente Polisia, Euclides Belo ho Komandante Polisia Munisípiu Dili, Superintendente Xefe Armando Monteiro. Imajen/Eugénio Pereira

DILI, 18 juñu (TATOLI)-Komandante Polisia Nasionál Timor-Leste (PNTL) Munisípiu Dili, Superintendente Xefe Armando Monteiro, ohin, hahú hala’o knar ofisiál iha Komandu Polisia Munisípiu Dili, ne’ebé simu ho formatura hodi fó koñesimentu ba membru  unidade polisia hotu.

Hafoin ida ne’e, Komandante Armando kontinua hala’o enkontru hodi rona briefing hosi Segundu Komandante Polisia Munisípiu Dili, Superintendente Asistente Polisia, Euclides Belo, kona-ba progresu servisu sira ne’ebé Komandu Dili hala’o durante ne’e.

Ba dahuluk, Euclides Belo introdús knaar servisu ne’ebé nia asume nu’udar komandante interinu durante fulan tolu (Abril-Juñu) hodi aprezenta mós relatóriu servisu inklui diskute rekursu númeru polisia Dili nian no kondisaun infraestrutura no fasilidade servisu sira ne’ebé Komandu Dili iha hodi responde ba servisu manutensaun dame.

Euclides introdús mós planu servisu tinan ne’e ba oin, Komandu Dili prepara ona dezeñu ida  kona-ba reabilitasaun totál futuru edifísiu Eskuadra Polisia Comoro, inklui Eskuadra Polisia Postu Administrativu Vera Cruz ne’ebé sei harii iha Palapasu, Suku Motaél.

“Ohin ne’e ha’u briefing progresu servisu hotu ne’ebé hala’o durante fulan tolu nu’udar komandante interinu, atu komandante hatene no akompaña progresu servisu ne’ebé hala’o ona,” informa Segundu Komandante Euclides Belo, ohin, ba jornalista iha Komandu Polisia  Munisípiu Dili.

Euclides esplika mós orden hosi Komandante Jerál PNTL hodi hamosu operasaun “Aplika Lei, Dili Hakmatek” liga ho polítika Komandu asegura Dili oras 24 ne’ebé envolve Polisia Espesiál Seksaun Anti Terrorizmu (UPEAT) koordena ho autoridade lokál, Ofisial Polisia Suku (OPS) no Konsellu Polisiamentu Komunitária (KPK) atu lori Dili sai hosi konflitu ba dame.

“Ha’u briefing mós kona-ba situasaun sira ne’ebé akontese iha Dili laran ho operasaun ne’ebé hala’o ona,” hateten Euclides Belo.

Komandante Munisípiu Dili, Armando Monteiro ho Euclides Belo sei hala’o enkontru ho Prezidente Autoridade Munisípiu Dili, xefe suku sira no mós membru konsellu suku inklui veteranu, reprezentante juventude, hodi hametin liután liña koordenasaun servisu.

Enkontru seluk tan, maka sei kria kooperasaun ho reitoria universidade hotu iha Dili, eskola públiku sira no Organizasaun Naun Governmental (ONG) no parseiru dezenvolvimentu sira.

“Hanesan komandante ami mak buka koopera ho ita nia Na’i Bispu sira ho lider relijiozu sira inklui prezidente autoridade Dili ho autoridade suku no universidade sira, eskola sira hodi hametin liña koordenasaun implementa lei no orden,” tenik Euclides Belo.

Nia mensiona katak, misaun PNTL tenke hakbesik-an ba povu hodi nune’e bele servisu metin liután no hametin estabilidade nasionál.

Tuir planu iha fulan ne’e ba oin, Komandante Armando sei hala’o vizita kortezia hodi enkontru ho komandante polisia Eskuadra Atauro ne’ebé asegura seguransa ba povu suku lima (5), Kristu Rei ho suku ualu (8), Don Aleixo ho suku hitu (7) Metinaro ho suku tolu (3), Nain Feto ho suku neen (6) no Vera Krús ho suku hitu (7).

Euclides Belo aprofunda katak, enkontru sira ne’e  hala’o ho objetivu hametin mós lasu kooperasaun polisia hodi asegura dame iha kada suku, aldeia to’o bairru.

Jornalista      : Eugénio Pereira 

Editór            : Francisco Simões

HAKEREK NO HATÁN

Please enter your comment!
Please enter your name here