Segundu Komandante Polisia Munisípiu Dili, Superintendete Asistente Polisia, Euclides Belo. Imajen/Eugénio Pereira

DILI, 18 juñu 2019 (TATOLI)-  Komandu Munisípiu Dili hein hela desizaun Komandu Jerál PNTL ho Governu liuhosi Ministériu Interior atu halo konstrusaun ba futuru edifísiu  Komandu Eskuadra Polisia Don Aleixo, Comoro ho Edifísiu Eskuadra Polisia Postu Administrativu Vera Cruz iha Motaél, Dili.

Segundu Komandante Polisia Munisípiu Dili, Superintendente Asistente Polisia, Euclides Belo, esplika, sira nia parte aprezenta ona dezeñu ba Komandu PNTL no Ministériu Interior.

“Ita hakarak konstrusaun foun totál ba Eskuadra Polisia Comoro para sees hosi inundasaun ne’e no sei harii mós Eskuadra Polisia  Vera Cruz iha Motaél nian ne’ebé Komandu PNTL no Ministériu Interior maka sei haree,” informa n Euclides Belo, ohin, ba jornalista iha Edifísiu Komandu Munisípiu Dili.

Ho planu hirak ne’e, Euclides  briefing mós ba Komandante Polisia Munisípiu Dili, Superintendente Xefe Armando Monteiro, atu hatene kona-ba planu servisu hadi’a infraestrutura Eskuadra Polisia Don Aleixo Comoro no Distritu Dili ninia dezeñu sira.

Kona-ba totál orsamentu atu reabilita edifísiu, Komandante Euclides esplika, parte tékniku Ministériu Interior maka sei haree no Komandu Dili hein de’it rezultadu implementasaun.

“Planu sira ne’e ami kanaliza ona ba Komandu Jerál liu Diresaun Planeamentu maka sei haree,” Euclides Belo hateten.

Nia esplika, dezeñu futuru edifísiu Polisia Eskuadra Comoro ne’e sei halo di’ak, inklui kria fasilidade servisu ne’ebé sufisiente ba polisia hodi hala’o servisu atendimentu ba públiku.

Kona-ba futuru edifísiu Eskuadra Polisia Vera Cruz iha Motaél, parte Komandu Dili hein hela ekipa tékniku Diresaun Nasional Terras Propriedade (DNTP) mak sei deside rai no harii edifísiu ne’e koopera autoridade Suku Motaél.

Daudaun ne’e, parte Governu Australia komesa reabilita ona estabelesimentu edifísiu servisu Polisia Unidade Vulneravel (VPU) nian iha Caicoli Dili.

Jornalista      : Eugénio Pereira

Editór            : Francisco Simões

HAKEREK NO HATÁN

Please enter your comment!
Please enter your name here