Prezidente Komisaun Omenajen, Virgílio Smith. Imajen Tatoli/Egas Cristóvão

DILI, 18 juñu 2019 (TATOLI)—Koordenadór Jerál Komisaun Organizadora ba Komemorasaun Tinan 20 Konsulta Populár hateten, tema prinsipál ba komemorasaun ne’e mak “Ahu-Kdesan, Pás, Dezenvolvimentu no Progresu” tanba Timor-Leste ne’ebé manán independénsia liuhusi ahu-kdesan iha 1999 agora hetan mudansa dezenvolvimentu ne’ebé signifikante.

“Tema prinsipál ba Komemorasaun Loron Konsulta Populár iha Timor-Leste ba dala-20 maka ‘Ahu-Kdesan, Pás, Dezenvolvimentu no Progresu’. Katak, hosi ahu-kdesan hakat ba hadame malu hodi hametin unidade nasionál, avansa ba dezenvolvimentu to’o iha progresu ne’ebé ita haree dadaun ne’e,” dehan Koordenadór Jerál Komisaun Organizadora, Virgílio Smith, ba jornalista sira liuhusi konferénsia imprensa kona-ba Lansamentu Programa Konsulta Populár ba dala-20 ba jornalista sira iha aula Sorumutu Centro Nacional Chega (CNC), Antigu Komarka, Balide, Dili, tersa (18/6/2019).

Tanba, nia hatutan, saida mak akontese iha 1999 to’o ohin loron haree iha mudansa sira ne’ebé signifikante tebes. Iha tinan 20 nia laran ne’e, Timor-Leste iha esperiénsia ida ahu-kdesan iha 1999 to’o ohin loron iha nível ida ne’ebé mak hotu-hotu haree hetan agora.

Objetivu hosi selebrasaun ne’e, nia subliña, atu destaka no fó onra ba korajen, ba terus hotu-hotu ne’ebé funu na’in FALINTIL sira hala’o hosi tempu ne’ebé mak funu ba ukun rasik-án hahú to’o tempu ne’ebé mak hetan akantonamentu hodi evita asaun ruma hasoru atividade milísia sira nian ne’ebé mak hala’o hela violénsia ne’ebé espíritu ida ne’ebé sakrifika-án para labele responde ba asaun sira ne’ebé milísia sira halo.

Aleinde ida ne’e, nia dehan, atu fó onra ba ema hotu-hotu ne’ebé mak sakrifika sira-nia moris rasik ba libertasaun no independénsia nasionál. Objetivu seluk mak fó onra ba luta na’in sira hotu-hotu iha Frente Armada, Frente Klandestina, Frente Diplomátika tanba iha luta ba ukun rasik-án ne’e iha frente oioin ne’ebé komunga objetivu ida de’it to’o ba libertasaun nasionál.

Entretantu, nia haktuir, objetivu seluk tan mak atu rekoñese serbisu no sakrifísiu hotu-hotu ne’ebé mak belun sira hosi Nasaun Unida liliu sira ne’ebé mak mai halo kna’ar misaun Nasaun Unida nian hanesan UNAMET. Ema sira ne’e ariska mós sira-nia moris rasik hodi bele fó garantia ba povu Timor tomak bele ezerse ninia direitu ba autodeterminasaun liuhusi Konsulta Populár iha loron 30 agostu 1999.

“Ita mós valoriza serbisu no sakrifísiu ba ema sira ne’ebé mak mai fó asisténsia umanitária ba ita ninia povu no populasaun sira ne’ebé mak hetan violénsia no estragu, uma sunu no buat hotu-hotu lakon. Ita valoriza mós ba ita-nia belun jornalista internasionál  sira ne’ebé mak halo kobertura ba atividade hotu-horu ne’ebé mak akontese iha 1999,” kordenadór jerál ne’e esklarese.

Kona-ba orsamentu, nia hatán, orsamentu ba Komemorasaun Tinan 20 Konsulta Populár ne’e governu Timor-Lesrte aloka orsamentu hamutuk milliaun $1.5 ne’ebé sei kobre ba preparasaun no atividade sira tomak ne’ebé sei halo iha nasionál no mós balun aloka ba munisípiu sira iha Timor laran tomak. Orsamentu ne’ebé aloka ona munisípiu sira hamutuk milliaun $3.77 ne’e ba atividade konsertu múzika, ezibisaun, atividade kulturál no selebrasaun ba loron konsulta populár ne’e rasik iha munisípiu ida-idak.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here