Koordenadór Komisaun Organizadora ba loron Konsulta Populár da-20, Hugo Maria Fernandes. Imajen Tatoli/Egas Cristóvão.

DILI, 18 juñu 2019 (TATOLI)—Governu liuhusi Komisaun Organizadora ba Komemorasaun Tinan 20 Konsulta Populár, ohin, ofisialmente lansa programa Festivál Kulturál Rezisténsia Populár ba Kompetisaun Korrál ba Múzika Rezisténsia nian sira no Festivál Poema Rezisténsia Populár tuir kritéria sira ne’ebé komisaun termina tiha ona.

“Kritéria ba partisipante grupu korrál mak tenke kompostu hosi feto ho mane, barak liu ema na’in 16 no uituan liu na’in ualu (8). Grupu bele hosi instituisaun akadémika (universidade ka eskola sekundária), organizasaun juventude ka grupu korrál hosi Igreja. Sidadaun Timor-Leste. Uza roupa tenke tais kombina ho hena slunk ka bele mós kambatik ho kabaya. Roupa tenke banati iha ita-nia lisan (labele sexi, nakloke no aperta isin liliu feto sira),” dehan Koordenadór Seksaun Programa, Hugo Fernandes, ba jornalista sira liuhusi konferénsia imprensa ne’ebé hala’o iha Aula Sorumutu Centro Nacional Chega (CNC), Antigu  Komarka, Balide, Dili, tersa (18/6/2019).

Aleinde ida ne’e, nia hatutan, iha mós kritéria ba partisipante sira ne’ebé atu tuir kompetisaun ba lee poezia mak partisipante tenke mai hosi estudante sekundáriu no universidade, tenke lori kartaun estudante fotokopia tahan ida, foto koloridu foun tahan ida no partisipante sira tenke mai ho ninia profesór ida ka dosente ida.

Ba prosesu rejistrasaun nian, Hugo hateten, partisipante sira hahú rejistu iha loron 22-29 juñu 2019 no formuláriu ba rejistu nian bele mai foti iha ekipa komisaun ba Kompetisaun Lee  Poezia iha Centro Nacional Chega iha Antigu Komarka Balide. Partisipante sira bele mai hosi estudante sekundáriu no universidade nu-mínimu partisipante hosi kada eskola ka universidade ema na’in rua (2).

Kona-ba testu múzika no poema, Koordenadór Seksaun Programa ne’e informa, prepara hosi Kominsaun Organizadora no partisipante sira sei mai foti testu sira ne’e iha biban technical meeting. Kada partisipante sira sei lee poezia no múzika korrál oin rua maka múzika obrigatóriu no múzika eskollidu. Iha fulan ida-nia laran, grupu sira ne’e halo preparasaun no iha fulan jullu hahú halo ona kompetisaun.

Entretantu, nia haktuir, kona-ba festivál kulturál pintura nian hahú hosi ohin (18/6/2019) Komisaun Organizadora loke anúnsiu ne’e to’o loron 15 jullu 2019. Iha loron tefere, komisaun organizadora simu ona pintura sira hosi partisipante sira.

“Komisaun Organizadora mós tinan ida ne’e hakarak involve artista ka pintór sira hodi partisipa iha Komemorasaun Tinan 20 Konsulta Populár. Komisaun Organizadora konvida pintór profisionál no públiku atu aprezenta pintura sira kona-ba eventu istóriku sira ne’ebé mak akontese ona iha tinan 1999 liu-ba ne’e,” nia hateten.

Tanba, nia haktuir, pinta nu’udar espresaun livre artístiku ema-nian ba eventu sira ka momentu ruma mak artista ka pintór ne’e hakarak espresa liuhusi medium ne’ebé mak nia hanoin bele hateten sai ka ko’alia kona-ba nia espresaun.

“Komisaun Organizadora husu atu pintór sira atu espresa sira-nia memória ba eventu istóriku sira ne’ebé mak akontese iha tinan 1999. Momentu istóriku sira ne’e, hahú hosi kedas periodu fulan janeiru–dezembru 1999 nian. Pintór sira bele hili rasik momentu ka eventu ida ne’ebé mak interesadu liu no rai liu memória ne’ebé mak fó impaktu ba nia moris pesoál ka ba públiku,” Hugo esklarese.

Nia informa, loron ikus Komisaun Organizadora simu pintura sira hosi partisipante sira mak loron 12 jullu 2019 no hodi halo preparasaun ba ezibisaun iha loron 15-19 jullu 2019. Tuir planu, data ezibisaun ne’ebé Komisaun Organizadora determina ona mak ezibisaun ne’e sei hala’o iha loron 22 jullu–20 setembru 2019 ne’ebé sei realiza iha Sentru Konvensaun Dili (CCD-sigla portugés).

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here