Sekretáriu Estadu Komunikasaun Sosiál, Merício Juvinal dos Reis 'Akara'. Imajen Tatoli/Egas Cristóvão

DILI, 18 juñu 2019 (TATOLI)Munísipiu Dili ho Liquiçá sai hanesan pilotu Rádiu Televizaun Timor-Leste ep (RTTL-ep) hosi sistema analog ba dijitalizasaun iha futuru.

“Ita sei dezenvolve etapa ba etapa. Etapa primeiru Dili, Liquiçá ho munisípiu sira besik depois sei to’o munisípiu hotu-hotu. Dadaun ne’e ita konsidera hanesan pilotu no sei hahú uluk iha fatin rua ne’e. Bainhira projetu ne’e la’o ho di’ak, ita sei halo komunikasaun hodi extende kooperasaun nasaun rua (Timor-Leste no Xina),” Merício Akara, ko’alia iha edifísiu RTTL, Caicoli, ohin, hafoin lansa konstrusaun sistema analog ba dijitalizasaun RTTL iha futuru.

Sekretáriu Estadu Komuniksaun Sosiál, Merício Akara, haktuir projetu dijitalizasaun ne’e realiza hafoin governu Timor-Leste aprezenta proposta ida ba governu Xina no Xina prontu apoia.

Razaun Governu Timor-Leste deside hili sistema Xina nian, nia esplika, tanba Xina apoia orsamentu millaun $5 hodi finansia projetu ne’e.

Lansamentu ne’e hala’o hafoin Sekretáriu Estadu Komunikasaun Sosiál, Merício Akara ho ekipa tékniku RTTL nian vizita Xina hodi haree direta dijitalizasaun ne’ebé dezenvolvidu.

Akara dehan, tuir kontratu ne’ebé iha, projetu ne’e sei finaliza entre fulan-neen to’o tinan-ida, hahú hosi loron lansamentu.

“Signifika hahú ohin projetu hahú ona. Hein katak hotu-hotu bele kolabora no apoia iha nível polítika to’o tékniku sira para realiza projetu importante ida ne’e. Planu ida ne’e ita realiza sei hadi’a ita-nia kualidade, sistema analog ba ona dijitál, imajen televizaun nian sei ho kualidade di’ak liu no área rurais bele asesu hotu,” nia haklaken.

Tuir nia, bainhira projetu ne’e finaliza ona sei fó kanál 22 hodi asesu, depende ba ida-idak mak hili.

“Ha’u-nia hanoin atu hetan lukru hosi kanál 22 ne’e, bele oferese ba entidade sira seluk ka mídia sira seluk ne’ebé mak hakarak uza kanál RTTL nian. Ida ne’e mós rendimentu di’ak ba RTTL hanesan empreza públika. Lei fó dalan atu sira bele iha rendimentu rasik,” nia katak.

Merício esplika, sistema dijitalizasaun ne’e ho padraun internasionál, tanba iha mundu sistema haat (4) de’it mak hanesan Europa, Estadu Unidu Amérika, Japaun  ho Xina.

Iha fatin hanesan, Prezidente RTTL ep, Francisco Gari, esplika projetu ne’e hanesan fahe dahuluk hodi haree progresu implementasaun hosi projetu ne’e.

“Agora foku ba Dili ho Liquiçá. Ita harii ona torre foun iha foho Kutulau, maibé hosi Dili nian mak liga ba foho Kutulau ne’e depois komunidade bele asesu hanesan fatin sira ne’ebé besik. Governu iha polítika atu alarga mós ba munisípiu sira seluk,” nia subliña.

Partisipa iha lansamentu ne’e mak hanesan Eis Sekretáriu Estadu Komunikasaun Sosiál atuál Sekretáriu Estadu Juventude no Desportu, Nélio Isaac Sarmento, Sekretáriu Estadu Arte no Kultura, Teóflio Caldas, Sekretáriu Estadu Kooperativa, Arsenio Pereira, deputadu no deputada balun no mós ekipa hosi Xina.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here