Prezidente Autoridade Rejiaun Administrativa Espesiál Oe-Cusse Ambeno (RAEOA), Mari Alkatiri. Imajen/Egas Cristovão

OE-CUSSE, 17 juñu 2019 (TATOLI)– Veteranu hosi Rejiaun Administrativu Espesiál Oe-Cusse Ambeno (RAEOA), José Antonio Ote  hatete, se de’it mak atu substitui Mari Alkatiri, atuál prezidente autoridade RAEOA, tenke iha koñesimentu no esperiénsia.

Veteranu José Antonio Ote, afirma lia hirak ne’e hosi responde Ajénsia TATOLI, ohin,  iha Oe-Cusse, relasiona ho mandatu Mari Alkatiri nian ne’ebé sei termina iha 30 jullu, tinan ne’e.

Liuhosi konferénsia Aliansa Mudansa Ba Progresu (AMP) nian durante loron rua, Sábadu-Domingu (15-16/6/2019), iha Dili, maioria konferensista AMP mós  deside la-extende mandatu Prezidente Autoridade RAOA, Mari Alkatiri nian.

Veteranu hosi RAEOA, José Antonio Ote dehan, oras besik to’o ona atu termina mandatu Mari Alkatiri nian,  maibé molok atu ba ne’ebá nia fó obrigadu barak ba servisu hotu ne’ebé hatudu ona rezultadu.

“Maske durante ne’e, Mari Alkatiri nia prezensa ladún amigavél ho povu Oe-Cusse. Maibé, se de’it maka atu substitui Mari Alkatiri, ema tenke iha koñesimentu no esperiénsia, nune’e mós ema tenke ho karater amigavél ho povu atu labele hamosu deskontamentu hanesan Mari Alkatiri nia mandatu durante ne’e,” afirma José Antonio Ote.

Aeroportu Oe-Cusse Marka Istória Foun

Aeroportu Internasionál Oe-Cusse “Rota do Sândalo”

Biban ne’e, veteranu José Antonio Ote,  hateten mós katak, serimónia inaugurasaun ba Aeroportu Internasionál Oe-Cusse “Rota do Sândalo ne’ebé sei akontese iha loron 18 juñu, ne’e hanesan marka istória foun ida tanba sei fó benefísiu ba rejiaun ne’e.

“Serimónia aban, ida ne’e ba dahuluk mai Oe-Cusse no sei fó benefísiu boot ida mai rejiaun ida ne’e,”  hateten José Antonio Ote.

Ote esplika, istórikamente uluk Oe-Cusse halo revolusaun kontra kolonializmu, nune’e ho eventu inaugurasaun aeroportu ne’e atu responde ba revolusaun. Resposta ida ne’e di’ak ba hirak ne’ebé sei moris no bei’ala sira ne’ebé uluk organiza-an hodi kontra kolonializmu no imperializmu.

Tuir Ote,  uluk Oe-Cusse nu’udar kapitál timor, tanba saida maka la muda kapitál mai fali Oe-Cusse, maibé haree ba infraestrutura, agora ita haree Oe-Cusse sai kapitál, nune’e mós Oe-Cusse bele sai kapitál igreja katólika nian tanba ko’alia kona-ba deskobrimentu.

Jornalista        : Zezito Silva

Editór              : Francisco Simões

1 KOMENTÁRIU

  1. Agradece ba Sr. Mari Alkatiri, tamba bele muda Oe Cusi sai cidade neebe bele atrai investimento estranjeru, mai investe iha oecusi.
    Husu Governo, bele uja sistema ida nee hodi aplika mos iha municipal sira seluk iha territorial TIMOR LESTE, atu nunee, povu bele goza no loko ba ukun rasik an ida nee Liu husi Dezembolvemento Nasional.

HAKEREK NO HATÁN

Please enter your comment!
Please enter your name here