Prezidente Republika, Francisco Guterres Lú Olo ho nia espoza Cidália Nobre Guterres, simu hosi lia-nain sira iha Aeroportu Internasionál Oe-Cusse, Segunda (17/6/2019). Imajen/ZEESM

OE-CUSSE, 17 juñu 2019 (TATOLI) – Prezidente Repúblika, Francisco Guterres “Lú Olo”, hateten, problema edukasaun, saúde, infraestrutura, bee, saneamentu, inklui meiu ambiente maka Estadu presiza iha polítika atu hametin tanba Estadu nia objetivu atu tau atensaun ba ema nia moris.

Prezidente Repúblika, Francisco Guterres Lú Olo, rega ai-aon iha ámbitu serimónia kuda ai-oan iha Lifau, RAEOA, Segunda (17/6/2019). Imajen/ZEESM

“Problema hothotu ita presiza polítika hodi rezolve, nune’e sentru atensaun hosi Estadu maka povu,” hateten Prezidente Repúblika, Francisco Guterres  Lú Olo, ohin, iha nia intervensaun iha ámbitu serimónia kuda ai-oan iha Lifau, Rejiaun Administrativu Espesiál Oe-Cusse Ambeno (RAEOA).

Lú Olo friza katak, problema meiu ambiente daudaun ne’e, timoroan seidauk sente, maibé mundu preokupa no hakilar ida ne’e tanba mundu la tau atensaun maka mundu sei hakoi nia-an rasik.

Lú Olo hatutan, Timor-Leste rai ki’ik ho nia própria karaterístika kultura no seluk tan, inklui meiu ambiente, ne’ebé timoroan la kuida ka at ba beibeik maka timoroan sei sofre nia konsekuénsia, timoroan nia jerasaun sira tuir mai sei sente nia konsekuénsia tanba rai maran, bee la iha, anin la fresku no seluk tan.

Tanba ne’e, Xefe Estadu apela ba povu tomak atu bele kuda ai-oan ida iha fatin ne’ebé ema hela ba, atu haburas nafatin meiu ambiente.

Iha fatin hanesan, Prezidente Autoridade RAEOA, Mari Alkatiri, akresenta, ohin, iha Lifau hodi kuda ai-oan ho objetivu atu halo fatin ne’e sai matak malirin ba timoroan hotu.

 Jornalista        : Zezito Silva

Editór              : Francisco Simões

HAKEREK NO HATÁN

Please enter your comment!
Please enter your name here