Komandante Komandu Operasaun Nasionál (KKON), Superintendente Xefe Pedro Belo. Imajen/PNTL .

DILI, 17 juñu (TATOLI)-Komandante Komandu Operasionál Nasionál (KKON), Superintendente Xefe Pedro Belo, lamenta ho atitude ema deskoñesidu ne’ebé uza nia naran hodi kria ID falsu iha rede sosiál  Facebook.

Foin lalais ne’e, iha ema balun uza id falsu iha Facebook ho naran Pedro Belo no tau fotografia Pedro Belo nian, ne’ebé halo diskursu ódiu ba ema seluk nia kronolojia Facebook. Maibé, Pedro Belo, rasik la hatene, se mak kria id falsu ida ne’e.

Pedro Belo dehan, nia rasik aviza ona iha ninia kronolojia Facebook ho ID (naran) Pedro Belo hodi husu públiku la bele fiar ID falsu ne’ebé uza nia fotografia no naran hodi trata no soran eis organizasaun arte marsiál sira ne’ebé Estadu taka ona.

Pedro Belo rasik haruka ona ekipa Information Technology (IT) buka tuir  autór ne’ebé kria ID Facebook falsu ne’e komesa kedas iha fulan Janeiru no Fevereiru 2019.

Pedro konsidera ema ne’ebé kria ID falsu ne’e lakohi atu situasaun Timor-Leste moris iha dame.

Hanesan komandante operasaun PNTL, Pedro Belo aviza ba públiku atu labele fiar ho ID falsu ne’ebé ema lansa uza nia naran hakarak sobu estabilidade seguransa iha rai laran.

 “PNTL sei la tolera kualkér atividade kriminozu sira ne’ebé hakarak atu soran ema tun sa’e,” afirma Pedro Belo, hodi responde jornalista sira, ohin, iha Kuartél Jerál PNTL, Caicoli, Dili.

Pedro Belo husu atu ema hotu labele fahe tutan informasaun ne’ebé la loos. Tanba Timor-Leste sei uza ekipamentu modernu hodi deteta no prosesa autór sira ne’ebé uza Id falsu  tuir lei.

Jornalista      : Eugénio Pereira

Editór             : Francisco Simões

HAKEREK NO HATÁN

Please enter your comment!
Please enter your name here