Xefe Bankada,CNRT Duarte Nunes. Imajen/Egas Cristovão

DILI, 17 juñu 2019 (TATOLI) – Koligasaun Aliansa Mudansa ba Progresu (AMP) kompostu husi partidu CNRT, PLP no KHUNTO ne’ebé mak forma VIII Governu Konstitusionál, halo konferénsia nasionál durante loron rua hodi halo avaliasaun dezempeñu AMP nian no iha biban ne’e aprova rezolusaun ne’ebé iha parte ida mós dehan sei la-extende mandatu Prezidente Rejiaun Administrativa Espesiál Oe-cusse Ambeno (RAEOA), Marí Alkatiri ne’ebé sei remata iha 30 jullu 2019.

Konferénsia ne’e rasik partisipasa másima husi kuadru partidu tolu hanesan membru diretivu nasionál koligasaun AMP, membru VIII Governu, membru V Lejislatura Parlamentu Nasionál, membru superiór partidu tolu, inklui membru bankada UDT/Frente Mudansa.

Xefe Bankada CNRT, Duarte Nunes ne’ebé hanesan konferensista haktuir katak mezmu iha rezolusaun ne’e sita mós kona-ba mandatu Autoridade RAEOA, maibé ida ne’e kompeténsia Governu mak deside.

“Ida ne’e governu mak hatene, maibé horseik iha ami-nia konferénsia ne’e deside la-extende. Husu tok governu, ha’u hanesan deputadu la hatene. Bainhira to’o ona tempu sei fó sai. Ami ko’alia ne’e konferénsia nia membru sira-nia pozisaun,” Xefe Bankada CNRT, Duarte Nune’e informa ba jornalista sira iha Parlamentu Nasionál (PN), segunda ne’e.

Parte seluk Vise-Xefe Bankada FRETILIN, Francisco Miranda Branco hateten, desizaun Governu atu hili se de’it atu asume kna’ar hanesan Prezidente RAEOA di’ak hotu, hanesan mós líder istóriku Kayrala Xanana Gusmão ne’ebé antes ne’e ema temi atu asume kargu ne’e.

Vice Xefe Bankada FRETIlIN, Francisco Miranda Branco. Imajen/Egas Cristovão

“Maun Xanana mós ema esperiénsia boot iha luta libertasaun nasionál, esperiénsia hanesan Prezidente Repúblika, Primeiru-Ministru, ne’ebé diak liután,” tenik.

Liuhosi rezolusaun ne’e, parte ida AMP reitera ninia pozisaun iha kampaña eleitoral 2018 kona-ba sei la-rekondúz mandatu Prezidente RAEOA atuál ba mandatu foun no husu Primeiru-Ministru hodi bele komunika ba Prezidente Repúblika iha tempu badak.

Rezolusaun ne’ebé hetan aprovasaun husi konferensista sira, la’ós de’it ko’alia kona-ba mandatu Prezinte RAEOA maibé koa’lia mós kona-ba pozisaun polítika koligasaun AMP iha VIII Governu no Parlamentu Nasionál, liuhosi avaliasaun dezempeñu durante mandatu tinan ida. Rezolusaun ne’e rasik sei fó sai ba públiku iha tempu badak.

Entretantu to’o agora Primeiru-Ministru (PM), Taur matan Ruak seidauk fó sai ba públiku sei extende ka lae kargu Prezidente RAEOA no karik la-extende figura se mak sei asume kargu ne’e.

Marí Alkatiri simu pose iha loron 30 jullu 2014 no kriasaun RAEOA bazeia ba ba Lei nú 3/2014 18 juñu, ne’ebé aprova iha Parlamentu Nasionál no Promulgadu husi Prezidente Repúblika, ne’ebé antes ne’e atuál Primeiru-Ministru, Taur Matan Ruak.

Prezidente Autoridade durante ne’e hala’o serbisu hamutuk ho instituisaun sira seluk atu harii Zona Espesiál Ekonomia Sosiál Merkadu (ZEESM) iha Timor-Leste ho Projetu Pilotu sira iha Oe-cusse no Ambeno.

Lee mós notísia: http://www.tatoli.tl/2019/06/konferensia-amp-laos-buka-fo-sala-malu/?fbclid=IwAR1seQS_IsEWeMcyVNvX6ql0epcpAVYXEfVpgEMSN4Pe1dVfCtg18t5LajU

http://www.tatoli.tl/2019/06/kuadru-amp-seidauk-deskuti-remodelasaun/?fbclid=IwAR1NGF5_Z3ZdZWffOgovbfmtjfVuhLnUGqdY_BJVQ-NXi_fkvv56w17Vr48

Jornalista    : Julia Chatarina

Editór          : Rafy Belo

HAKEREK NO HATÁN

Please enter your comment!
Please enter your name here