Foos rai Timór. Foto TATOLI: Nelia Rosario

DILI, 17 juñu 2019 (TATOLI)-Loja Agrikultór 13 asina kontratu ho otel neen no restaurante lima no  padaria rua hodi fa´an foos Timór, 100% produtu lokál, fasilita husi Ministériu Agrikultura no Peska (MAP) no Japaun liuhusi JICA (Ajénsia Japaun ba Kooperasaun Internasionál).

Asina kontratu ne´e, nu´udar faze ba datoluk, iha edifísiu Embaixada Japaun, avenida Praia dos Coqueiros, segunda (17/06).

Embaixadór Japaun ba Timor-Leste, Hiroshi Minami hateten, governu Japaun apoiu setór agrikultura iha Timor-Leste liuliu produsaun foos tanba konsidera katak agrikultura ne’e setór importante ba Timor-Leste; ema barak serbisu iha área agrikultura maibé hasoru dezafiu tanba ne’e diplomata ne’e espera governu Japaun bele apoiu foos na’in sira iha Timor-Leste.

“Agora daudauk JICA serbisu ho Ministériu Agrikultura no Peska, ha’u espera katak kooperasaun entre JICA ho Ministériu Agrikultura bele kontinua no ha’u fiar katak iha futuru kooperasaun kontinua ho di’ak,” espera Embaixadór Hiroshi Minami perante jornalista sira.

Iha fatin hanesan, Ministru Agrikultura no Peska (MAP), Joaquim José Gusmão dos Reis Martins hateten, serimónia asina kontratu ne’e hala’o atu hasa’e rendimentu ba natar na’in sira liuhusi produtu lokál, foos rai.

“Serimónia ida ne’e ita halo tinan-tinan no tinan kotuk mós ita halo ona ho otél no restaurante hamutuk 15 no ba tinan ida ne’e aumenta tan 13. Nia background maka ita iha projetu ida ho JICA oinsá   atu hasa’e rendimentu ba natar na’in sira, liuhusi produsaun foos rai nian”.

“Iha elementu balun husi projetu ne’e maka oinsá atu normaliza kalendáriu kuda haree nian nune’e mós oinsá prátika agrikultura ne’ebé di’ak atu bele hasa’e ita-nia produsaun nune’e tinan ida ita bele kuda ba époka rua, ida ne’e maka objetivu projetu husi JICA no Ministériu Agrikultura no Peska ne’ebé la’o tiha ona, nune’e mós promove foos ne’ebé maka 100% orgániku ita-nia rai nian,” hateten tan ministru.

Governante ne’e mós hatutan iha fatór importante lubun ida maka presiza hadi’a atu hasae kualidade no kuantidade foos produtu lokál nian hanesan mekanizasaun mákina ba serbisu nian, irrigasaun, fini, rai ka espasu hodi kuda produtu refere.

“Fatór lubuk ida ne’e maka bele fó impaktu para ita bele hasa’e produsaun foos ninian, ita haree ba iha komponente sira ne’e hadi’a daudauk para tinan-tinan bele hasa’e tan área produtiva para bele hasa’e produsaun,” konsidera Ministru Joaquim José Gusmão Martins.

Tuir ministru, MAP iha mandatu VIII Governu Konstitusionál nia programa to’o 2023 mak haree oinsá hasa’e produsaun foos lokál bele to’o 70% no hela 30% mak foos importasaun.

“Maibé ida ne’e la’ós serbisu ida fasil, ita mós tenke iha mós parseiru ho ministériu seluk. Ho ida ne’e, ita serbisu ba oin ne’e ita la’ós serbisu ona hanesan ministériu agrikultura de’it maibé ita serbisu hanesan governu ona,” rekoñese ministru.

Governante ne’e haktuir mós katak mákina ne’ebé uza ba halo serbisu agrikultura nian sosa dezde 2008 ho totál mákina 400 resin. Maibé, husi mákina ne’ebé mak iha balun MAP tau ba leilaun tanba konsidera mákina sira ne’e ladún funsiona ho di’ak no nia kustu atu atu halo manutensaun ne’e maka’as liu kompara ho mákina hola foun.

“Ita iha unidade 56 maka atu leilaun, mas ema haree no ema hola rua de’it no 54 sei nafatin iha ita nia territóriu tomak. Totál mákina ne’e 400 ital; boot ho ki’ik nee la sura ho mákina sira ne’ebé maka uluk distribui ita seidauk hetan nia paradeiru oinsá”.

Tanba ne’e maka, tuir Joaquim José Gusmão dos Reis Martins, polítika ne’e sei haree estratéjia ne’e hanusá no MAP simu orientasaun husi Primeiru-Ministru Taur Matan Ruak. “Ita haree took ita tenke halo por faze”.

“Se leilaun hotu entaun ita atu serbisu hanusá, tanba ne’e maka ita sei iha faze estudu ida faze por faze para oinsá atu troka fali mákina sira ne’e ka entrega fali ba entidade ida ne’ebé bele jere mákina sira ne’e ho efisiente liu,” konklui governante ne’e.

Lee mós notísia: http://www.tatoli.tl/2019/06/loja-agrikultor-porsentu-100-produtu-lokal/

http://www.tatoli.tl/2019/05/map-nafatin-akompana-produtor-kiik-hodi-hasae-produsaun/

Jornalista       : Nelia Rosario

Editór             : Rafy Belo

HAKEREK NO HATÁN

Please enter your comment!
Please enter your name here