Bispu Dioseze Dili, Mgr. Virgílio do Carmo da Silva, SDB. Imajen/Espesiál

DILI, 15 juñu 2019 (TATOLI)—Bispu Dioseze Dili apela ba feto foinsa’e sira atu kuida ho sentidu respeita sira-nia án nu’udar feto hodi labele monu ba tentasaun no hakarak mundu nian ne’ebé estraga sira-nia futuru.

“Ha’u hakarak fó hanoin liliu ba feto foinsa’e sira atu hatene kuida sira-nia án ho sentidu respeita sira-nia án. Iha tempu sira-nia namoru hatene sira-nia án, kuandu to’o ona tempu kazamentu mak ita bele tama iha buat ida kle’an liu. Nu’udar sarani ita tenke tau ida ne’e iha ulun,” dehan Bispu Dioseze Dili, Don Virgílio do Carmo da Silva, SDB, ba Ajénsia TATOLI liuhusi entrevista hafoin ramata selebrasaun misa aniversáriu St. António iha Kapela St. António Prizaun Becora, Dili, sábadu (15/6/2019), hodi fó mensajen ba feto sira relasiona ho ema soe bebé iha Lahane foin dadauk ne’e.

Atu labele akontese aktu asaun soe bebé, Don Vitgílio hatutan, husu ba feto foinsa’e sira hanoin uluk lai to’o dala sanulu molok halo asaun dala atus ida. Bainhira monu ona ba dalan naksalak sira ne’e, feto sira bele hanoin atu estraga ka soe bebé.

“Ha’u hakarak mós fo hanoin liliu ba feto-oan sira. Kuandu monu ona iha situasaun hanesan ne’e, la’ós atu ba soe bebé. Uluk kedas ha’u ko’alia ona, madre kongregasaun balun ne’ebé sira disponível atu simu no tau-matan ba labarik sira. Ne’e duni, kuandu feto-oan sira laiha kbiit ba ida ne’e, hakbesik-án ba Uma-Kreda ka madre sira, tanba ho nune’e de’it mak ita bele salva moris ida ne’ebé Maromak fó liuhusi ninia aktu sira ne’e,” líder Igreja Katólika ne’e apela.

Razaun fundamentál soe bebé, tuir Don Virgílio, karik ta’uk tanba lakohi hamoe ninia família ka karik nia seidauk prontu atu asumi responsabilidae nu’udar inan no ta’uk tanba psikolójikamente nia dependente. Ho buat hirak ne’e hotu, entaun  ikus mai termina nia án sees hosi sentidu responsabilidade ida ne’e.

Tanbasá mak aktu asaun soe bebé mosu beibeik iha ita-nia sosiedade liu-liu iha Sidade Dili, amu bispu hatán, ne’e Uma-Kreda no edukadór nia responsabiliade maibé liliu inan-aman sira-nia responsabilidade atu kontrola no akompaña oan sira bainhira oan sira to’o ona idade ida joven. Agora mundu moderna, buat hotu livre no ho mídia sosiál ne’ebé aprezenta buat hotu liuhusi seksu livre, tan ne’e inan-aman sira tenke iha responsabilidade ida atu akompaña oan sira.

“Responsabilidade ida mós ha’u hanoin soe mós iha foinsae sira rasik. Liliu la’ós ba feto-oan sira de’it maibé ba mane-oan sira mós. Mane-oan sira mós tenke hatene ida ne’e. Bainhira soe bebé ona tenke tau todan ba feto. Maibé kauza ne’e la’ós labarik feto tuur mesa-mesak, buat ne’e mosu, sai isin rua. Ne’e duni, iha mós responsabilidade ba mane-oan sira tenke hatene iha relasaun namoru ninian tenke iha mós hatene hanoin uluk. La’ós halo tiha mak foin hanoin,” amu bispu fó hanoin.

Relasiona ho asuntu soe bebé, bispu haktuir, Uma-Kreda liliu Dioseze Dili durante ne’e halo ona aprosimasaun ba família sira liuhusi pastorál ba família. Tan ne’e, Departementu Família ninian durante tinan rua ka tolu, hahú hakbiit komisaun ida ne’e aproveita tama liliu iha Dili laran, tama iha parókia sira atu tuun to’o iha aldeia sira atu halo formasaun kona-ba ida ne’e.

Formasaun refere, tuir bispu, la’ós de’it pastorál ba família maibé mós liuhusi eskola sira oinsá halo promosaun no promosaun liuhusi mídia komunikasaun sosiál Dioseze Dili atu fó folin ka respeitu ba iha moris ida-nia moris.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here