Younes M'Jahed, prezidente foun IFJ. Imajen/TLPU

TUNIS, 16 juñu 2019 (TATOLI)—Kongresu Mundiál Jornalista sira nian ba loron ikus, 14 juñu 2019, iha sidade Tunis, Repúblika Tunisia, eleitu  Younes M’Jahed, hosi Marrokus nu’udar Prezidente foun ba Federation International of Journalist (IFJ).

Younes M’Jahed nu’udar jornalista iha da Ittihad Ichtiraki no ba-dahuluk Younes hamutuk ho IFJ iha Komité Ezekutivu hanesan asesór iha kongresu Recife iha tinan 1998 e kontinua eleitu hanesan vice prezidente iha kongresu ne’ebé maka hala’o iha Moskovu iha tinan 1998.

Younes M’Jahed, sai mós hanesan Prezidente senior iha kongresu ne’ebé hala’o iha Dublin iha juñu tinan 2013, e hetan eleitu fila fali iha kongresu ne’ebé maka hala’o iha Aners iha tinan 2016.

Younes M’Jahed atual ne’e hanesan sekretáriu jerál Sindikatu Nasionál Jornalista Marrokus, ne’ebé foin lalais ne’e hetan eleitu mós hanesan Prezidente Konsellu Imprensa Marrokus nian.

Younes M’Jahed, substitui pozisaun, Philippe Leruth, prezidente sesante ne’ebé lidera IFJ hahú hosi tinan 2016 to’o 2019.

Delegadu kongresu hosi nasaun 120 ne’ebé hola parte iha Kongresu IFJ ba dala-XXX ne’e, inklui Timor-Leste, ne’ebé partisipa hosi vise prezidente Timor-Leste Press Union (TLPU), Jordão Henrique, hili mós Zuliana Lainez, hanesan vise prezidente senior no Sabina Inderjit hosi India ho Shafir hosi Rusia Leste hanesan vise prezidente.

Kongresu internasionál ne’e ho tema “BA LIBERDADE JORNALISTA”, partisipa hosi reprezentante organizasaun jornalista sira nian ne’ebé sai nu’udar membru IFJ kuaze 300 ne’ebé mai hosi nasaun 120, inklui Timor-Leste.

TLPU sai membru permanente ba IFJ iha tinan 2016 no tinan ne’ebá ofisiálmente IFJ simu adezaun TLPU nian iha kongresu IFJ ba dala-XXIX ne’ebé hala’o iha Fransa, ne’ebé partisipa diretamente hosi eis prezidente TLPU, José António Belo.

 Lee mós : http://www.tatoli.tl/2019/06/tlpu-partisipa-i…rnalista-mundial/

 

Kontribuidór            : Jordão Henrique

Edisaun                    : Francisco Simões

HAKEREK NO HATÁN

Please enter your comment!
Please enter your name here