Imblema AMP

DILI, 16 juñu 2019 (TATOLI)—Kuadru polítiku sira hosi Aliansa Mudansa ba Progresu (AMP) kompostu hosi partidu Kongresu Nasionál Rekonstrusaun Timor (CNRT-sigla portugés), Partidu Libertasaun Populár (PLP) no Kmanek Haburas Unidade Timor Oan (KHUNTO) seidauk halo diskusaun kona-ba asuntu remodelasaun governu.

Koordenadór Jerál AMP, Francisco Kalbuadi Lay hateten kona-ba remodelasaun governu, nia rasik seidauk rona atu iha remodelasaun no seidauk iha diskusaun.

“To’o agora AMP sólidu, unidu no laiha remodelasaun tanba ami seidauk deskuti. Ami mós iha líder na’in tolu (Kay Rala Xanana Gusmão, Taur Matan Ruak no José Naimori Bucar) ne’ebé sempre iha ami-nia kotuk,” nia tenik iha konferénsia imprensa iha salaun otél Golgota, Rai Kotu, Comoro, Dili, hafoin enserra Konferénsia AMP, domingu ne’e.

Nia admite, iha rumor barak ko’alia kona-ba remodelasaun governu, hanesan direitu sidadaun ninian. “Ba sé de’it bele espékula. Polítika mak hanesan ne’e ona. Tanba ita moris iha polítika iha rai demokrátiku, ema hotu iha direitu atu espékula saida de’it,” nia esplika.

Tuir Sekretáriu Jerál CNRT ne’e, agora dadauk membru Governu no Parlamentu Nasionál sira sei konsentra hodi halo serbisu di’ak liu-tan ba oin.

“Tanba ne’e mak ami hasoru malu durante loron rua iha ne’e hodi konsolida malu no fortifika tan ami-nia unidade, para bele konsentra serbí povu no nasaun di’ak liu-tan ba futuru,” Kalbuadi akresenta.

Entretantu, tama tinan ida ona mandatu VIII Governu Konstitusionál eziste maibé sei iha pasta sia mak seidauk hetan pose nu’dar membru governu. Kandidatu membru governu ne’ebé seidauk hetan pose mak Francisco Kalbuadi Lay, Helder Lopez, Virgílio Smith, Jacinto Rigoberto, Tomás Cabral, José Turquel, Amandio de Sá Benevides, enkuantu Kay Rala Xanana Gusmão antes ne’e rezigna-án inklui António Verdial. Maioria kandidatu membru governu ne’ebé seidauk simu pose mai hosi partidu CNRT.

 Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here