Enserramentu konferénsia AMP iha salaun otél Golgota, Rai-kotu, Comoro, Dili, domingu ne’e. Imajen Tatoli/ Julia Chatarina

DILI, 16 juñu 2019 (TATOLI)—Koligasaun Aliansa Mudansa ba Progresu (AMP) kompostu hosi partidu tolu (CNRT, PLP no KHUNTO) ne’ebé forma VIII Governu Konstitusionál, enserra konferénsia loron rua hodi halo avaliasaun dezempeñu ba tinan ida, nune’e afirma konferénsia ne’e la’ós atu fó sala ba malu.

Prezidente Meza Konferénsia, Francisco Kalbuadi Lay hateten avaliasaun ne’e hosi membru diretivu nasionál koligasaun AMP hamutuk ho membru parlamentu, membru governu, membru superiór partidu tolu nian hamutuk ho UDT/Frente Mudansa hodi koordena malu di’ak liu-tan.

“La’ós mai buka fó sala malu maibé mai buka konsolida no koordena malu atu serbí povu di’ak liu-tan liuhosi VIII Governu hamutuk ho bankada Governu iha Parlamentu Nasionál. Problema laiha. Iha mundu polítiku ne’ebé de’it, buat ida ka rua bele falla maibé ami buka malu iha loron rua ne’e atu konsolida malu ne’ebé la’o furak tebes,” nia tenik iha konferénsia imprensa iha salaun otél Golgota, Rai-Kotu, Comoro, Dili, hafoin enserra konferénsia AMP, domingu ne’e.

Enkuantu, membru Konsellu Diretivu Partidu Kongresu Nasionál Rekonstrusaun Timor (CNRT-sigla portugés) no atuál Prezidente Parlamentu Nasionál, Arão Noé de Jesus agredese tanba durante loron rua konferénsia la’o ho di’ak no bele halo avaliasaun ba kna’ar no dezempeñu durante mandatu tinan ida nia laran to’o agora.

“Ha’u hein katak ho rezultadu evaluasaun no desizaun ohin bele modifika ita di’ak liu-tan hodi hala’o ita-nia kna’ar hodi serbí povu no kumpri devér ne’ebé kompromete ona iha eleisaun, liuhosi programa VIII Governu ne’ebé Parlamentu Nasionál aprova ona,” nia akresenta.

“Ho intervensaun horsehik no ohin la’ós atu hamenus, estraga ka ofende ema ida, maibé buka modifika ita ninia-án hamutuk hodi hasoru dezafíu ne’ebé mak ita sei infrenta durante mandatu tuir konstituisaun haruka,” Arão hatutan.

Iha biban hanesan, Vise Prezidente Meza hosi Partidu Libertasaun Populár (PLP), Fidelis Leite Magalhães hateten agora tempu atu hare dezempeñu tomak hodi halo metin liu-tan no armónia iha aliansa laran.

“Ita só bele serbí ita-nia nasaun bainhira polár metin. Ami hakarak konfirma no reafirma katak polár metin loos no prontu atu lori todan boot ba libertasaun povu nian to’o tinan 2023,” nia dehan.

Aleinde ne’e, Vise Prezidente Meza hosi Partidu Kmanek Haburas Unidade Nasionál Timor Oan (KHUNTO), José Agostinho da Silva hateten AMP hala’o konferénsia nasionál ho objetivu atu hametin liu-tan pozisaun AMP hodi asegura VIII Governu Konstitusionál to’o mandatu ramata.

Entretantu, konferénsia loron ikus ne’e, maski la hetan partisipasaun hosi Prezidente AMP, Kay Rala Xanana Gusmão, Portavóz AMP, Taur Matan Ruak no Konselleiru Másimu KHUNTO, José Naimori Bucar, maibé hetan partisipasaun másimu hosi kuadru partidu tolu inklui membru governu no parlamentu.

Rezultadu konferénsia AMP ne’e, hamosu rezolusaun ne’ebé hetan maioria aprovasaun hosi konfresista sira no tuir Prezidente Meza katak sei tama iha vigór iha loron aprovasaun 16 juñu 2019. Maski nune’e, akta rezolusaun rasik seidauk fó sai ba públiku tanba sei halo redasaun finál.

Prezidente Meza afirma liuhosi rezolusaun ne’e sei fó sai hanoin kona-ba governasaun ne’ebé tau interese nasionál aas liu interese AMP nian.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here