Jogadór Atlético Ultramar festeja sira nia vitória. Imajen Mídia LFA

DILI, 16 juñu 2019 (TATOLI)—Karketu Dili FC lakon beran “Matak Malirin”. Klube idéntiku ho ‘Matak Malirin’ ne’e sai malirin tebes duni. Lahanesan uluk. Uluk, kuandu joga, pontu tolu (3) garantidu iha liman. Agora laek ona.

Iha jogu kontinuasaun Primeira Divizaun Liga Futeból Amadora (LFA) jornada 4 époka 2019 ne’ebé hala’o iha Estádiu Munisipál Dili, ohin, armada aswa’in Dili ne’e (Karketu) hakruuk ba Atlético Ultramar ho golu 0-3.

Hosi vitória ne’ebé klube idéntiku ho ‘balsaun’ Manatuto ne’e gaña, dudu tuun kedas ekipa Karketu Dili FC ba zona dezpromosaun (degradasi-termu Indonézia) hamutuk ho Académica FC.

Treinadór Karketu Dili FC, Haryadi Hengkang

Iha jogu nia hahú, ekipa rua halimar balansu. Karketu halimar bola dook no Ultramar halimar bola rai (hamate bola) maibé ekipa rua la rezulta golu durante minutu 29 nia laran. Iha minutu 30, ekipa rua luta maka’as maibé luta ida ne’e afavór liu-ba Ultramar.  Jogadór Ultramar, Jorge Godinho (22), hetan oportunidade pasajen bola kalma hosi nia amigu Fabio Christian (10) hodi fura kedas rede Karketu. Rezultadu muda imediata ba 0-1.

Ba Karketu, derrota golu ida la’ós rezultadu finál. Sei iha tempu ba sira atu bele halo balansu ba golu ne’e. Tanba ne’e, jogadór Karketu kontinua hatudu sira nia esforsu. Sira kontinua luta hodi loke jogu ne’e sai ofensivu. Ikon Rofino (7) no Anau (8) ho nia kompatriota sira hosi Papua (Indonézia) koko halo bombardeiamentu maibé defeza adversáriu la fó ulun. La fó leet ba sira atu hakat liu.

Ekipa Ultramar kontinua vizilánsia no sira mós fila bombardeia adversáriu. Liu de’it minutu lima, jogadór nasionalidade brazileiru, Fabio Christian, uza nia tékniku individuál sobu defeza Karketu hodi halo Jorge Victor (22) ho nia amigu Filipe Oliveira (4) monu sala hodi nia lansa kedas xutu ba rede Karketu nune’e konkista golu sai 0-2.

Treinadór Atlético Ultramar, Gaspar Pinto

Hakat ba segunda parte, ekipa rua lansa kontra-atake ba malu ho rigorozu liu-tan. Ultramar hahú hasa’e rítmu jogu. Iha inísiu, sira halimar tiki-taka maibé iha segunda parte ne’e sira halimar joga ofensiva. Joga ho lais. Ultramar domina bola. Halo jogadór adversáriu raan nakali. Jogadór Amilcar Belo (11) halo erru hasoru jogadór Ultramar, Manuel Oliveira (24), lori árbitru Jaime Gomes foti kedas desizaun hodi fó kartaun mean ba jogadór refere.

Desizaun kartaun mean ne’e, lori jogadór Karketu sai pasivu. Liña koordenasaun entre jogadór Karketu sai maten. Serteja, Ultramar lakohi nonook. Sira aproveita Karketu nia jogu pasivu ne’e. Iha minutu 59, João Xavier (19) lansa tan golu ida bainhira hetan bola pasajen hosi nia amigu médiu, Bernabe Soares (20). Nune’e, rezultadu nakfilak ba 0-3.

To’o minutu terminadu, minutu 90, laiha tan golu ruma hosi ekipa rua. Rezultadu mantein ho 0-3. Vitória monu ba Ultramar.

Maski lakon, treinadór Karketu Dili FC, Haryadi Hengkang, ho oin midar hateten, jogu mak nune’e tanba jogu sempre iha manán, lakon no impata.

“Ha’u sente triste uituan maibé rezultadu mak hanesan ne’e ona. Jogu sempre iha ida manán no lakon, se lae bele impata. Esforsu tomak ha’u nian ha’u halo maibé rezultadu seidauk másimu. Maibé, jogu sira tuir mai ami sei hatudu rezultadu ne’ebé di’ak,” tenik Haryadi.

Treinadór ne’e fó obrigadu barak ba jogadór sira maski sira esforsu maibé la konsege hatudu rezultadu di’ak.

Iha sorin seluk, treinadór Atlético Ultramar, Gaspar Pinto hateten, nia sente kontente ho rezultadu ne’ebé nia ekipa hetan. Ba oin, nia fiar bele sai di’ak liu-tan. “Ha’u kontente ho rezultadu ohin ne’e. Ami nia esforsu durante fulan ida resin nia rezultadu mak ohin. Agora, ami tenke esforsa-án maka’as oinsá bele mantein nafatin iha Primeira Divizaun,” katak Gaspar.

Dadaun ne’e, tabela klasifikasaun provizóriu lidera hosi Lelenok United ho pontu 9, segundu lugár AS Ponta Leste ho pontu 9 (Lalenok ho Ponta Leste pontu hanesan maibé diferente golu), terseiru lugár Boavista de Timor ho pontu 7, kuartu lugár Assalam ho pontu 7 ( Boavista ho Assalam pontu hanesan maibé diferente golu), kintu lugár AD SLB Laulara ho pontu 4, sestu lugár Ultramar ho pontu 3, sétimu lugár Karketu ho pontu 1, oitavu lugár Académica ho pontu zero.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here