Treinadór Assalam FC, Francisco Araújo

DILI, 15 juñu 2019 (TATOLI)—Loraik tuku 16:00 ne’e, sei iha jogu kontinuasaun entre Assalam FC no Lalenok United iha Primeira Divizaun Liga Futeból Amadora (LFA) époka 2019 jornada daat ne’ebé hala’o iha Estádiu Munisipál Dili.

Hanesan jogu tolu liu-ba kotuk, Assalam manán rua no empata ida. Enkuantu, Lalenok lakon ida no manán dala rua.

Treinadór Assalam FC, Francisco Araújo hateten, hasoru Lalenok nia sente todan uituan tanba jogadór avansadu prinsipál Assalam na’in tolu mak hetan kartaun mean iha jogu hirak liu-ba kotuk.

Jogadór hirak ne’ebé hetan kartaun mean mak hanesan Fransyatma Kefin, Daniel Adadi no Edit Savio.

“Ami sente todan uituan iha jogu hasoru Lalenok. Ita haree Lalenok ekipa ne’ebé forte loos tanba sira-nia jogadór laiha ida mak kartaun mean. Maibé, hanesan treinadór, ha’u garantia no fó konfiansa tomak ba ha’u nia jogadór sira ne’ebé sei tún iha kampu laran bele hatudu rezultadu di’ak maski Lalenok forte,” tenik Francisco liuhosi konferénsia imprensa ne’ebé hala’o iha salaun Xanana Sport Center, Bairru Formosa, Dili, foin lalais ne’e.

Entretantu, treinadór Lalenok United la fó komentáriu tanba laiha tempu hodi marka prezensa iha konferénsia imprensa.

Dadaun ne’e, tabela klasifikasaun provizóriu lidera hosi AS Ponta Leste ho pontu 9, segundu lugár Boavista de Timor ho pontu 7, terseiru lugár Assalam ho pontu 7 (Boavista ho Assalam pontu hanesan maibé diferente golu), kuartu lugár Lalenok ho pontu 6, kintu lugár SLB ho pontu 4, sestu lugár Karketu ho pontu 1, setímu lugár Ultramar ho pontu zero, oitavu lugár Académica ho pontu zero.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here