Estudante sira hosi Eskola Primária Filiál Adara iha Aldeia Adara, Suku Beloi, Postu Administrativu Ataúro, Munisípiu Dili, tuur iha rai hodi partisipa prosesu aprendizajen. Imajen Tatoli/Evaristo Soares Martins

ATAÚRO, 13 juñu 2019 (TATOLI)—Estudante sira hosi Eskola Primária Filiál Adara iha Aldeia Adara, Suku Beloi, Postu Administrativu Ataúro, Munisípiu Dili, tuur iha rai hodi partisipa prosesu aprendizajen tanba laiha kadeira no meza.

“Ami iha ne’e hasoru difikuldade tanba laiha kadeira, meza no eskola mós uza de’it uma ki’ik ida. Ami rekomenda ba Ministériu Edukasaun (ME) mai kompleta obra eskola ne’e tanba sira (ME) mai harii tiha maibé la kompleta ho fasilidade,” Koordenadór Eskola Primária Filiál Adara, Ade Maquibu, ba Agência Tatoli iha nia kna’ar fatin, Aldeia Adara, kinta (13/6).

Koordenadór ne’e haktuir, eskola refere Ministériu Edukasaun harii ona iha 25 fevereiru 2019, maibé laiha fasilidade ne’ebé própriu—kadeira no meza laiha. Eskola refere iha alunu hamutuk 20 no iha mestri na’in ida.

Matéria aprendizajen iha eskola refere hamutuk 7. Kada loron hanorin matéria haat ba alunu sira. Matéria hirak ne’e mak hanesan literásia tetun, portugés, linguístika orál, matemátika, edukasaun fízika, arte kultura no relijiaun.

“Prosesu aprendizajen la’o di’ak maibé apoiu materiál diátiku mak la sufisiente,” profesór ne’e esklarese.

Iha fatin hanesan, estudante Above Martins, sente triste tanba kondisaun eskola aat liu. “Ami-nia eskola laiha kadeira no meza. Primeiru, ami hakarak husu ba governu fasilita uluk kadeira no meza,” dehan estudante ne’e.

Eskola Primária Filiál Adara ho médida 4×2 de’it no kondisaun aat tebes. Eskola refere taka de’it ho triplex.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here