Adeptu sira hosi Lalenok United no Assalam hamriik fó suporta ba sira nia ekipa. Imajen Mídia LFA

DILI, 15 juñu 2019 (TATOLI)—Unidade mak forsa. Se iha serbisu hamutuk ho ekipa no kolaborasaun ne’ebé di’ak, sei atinje rezultadu ne’ebé furak.

Lalenok sai lalenok ba aan rasik. Katak, sira ne’e sira. Sira la’ós ema seluk. Prinsípiu ida ne’e, lori ekipa Lalenok United hatudu-aan ho fiar-aan. La ta’uk. Sira kaer-metin espíritu ida. Espíritu unidade. Unidade mak sira-nia forsa.

Ho unidade ne’e, ohin loraik, ekipa lideradu Yance Matmei ne’e atinje rezultadu ne’ebé furak. Sira lori novidade kmanek. Lori vitória ba adeptu no estrutura klube Lalenok. Wow! La’ós Laleia de’it mak wow maibé Lalenok mós wow. He-he-he.

Jogu kontinuasaun Primeira Divizaun Liga Futeból Amadora (LFA) époka 2019 ne’ebé hala’o iha Estádiu Munisipál Dili, ohin, Lalenok United riba Assalam FC ho golu 4-0. Tanba ne’e, Assalam tenke fila ho nisik no Lalenok fila ho oin-midar (senyum). Vitória ne’ebé Lalenok gaña, lori ekipa ne’e provizoriamente ukun tabele klasifikasaun ho pontu 9.

Jogadór Lalenok United no Assalam ataka malu. Imajen Mídia LFA

Bainhira jogu primeira parte hahú, ekipa rua lansa kontra-atake tuir ida-idak nia tékniku. Assalam ho tékniku tiki-taka no hakarak prodúz golu ho neik maibé difísil. Defeza adversáriu la fó fatin. Lalenok lansa kontra-atake ho rápida no halimar bola dook. Nune’e, iha minutu 16, Elias Mesquita (10) lansa kedas golu dahuluk bainhira bola barullu iha grandeia Assalam nian halo guarda rede Adérito Raul (1) halai sala. Bola golu. Lori Lalenok lidera jogu ho golu 1-0.

Maski simu ona golu ida hosi armada Lalenok, jogadór Assalam kontinua hatudu jogu ne’ebé bonitu halo adeptu hosi ekipa rua la baruk fó suporta. Adeptu Assalam barak maibé la barak hanesan adeptu Lalenok. Hosi tribun parte loromonu no lorosa’e, bandeira no kamizola Lalenok domina.

Minutu la’o ba bebeik.  Jogadór Lalenok la fó fatin ba avandadu Assalam atu domina bola. Jogadór Lalenok sempre hamate tékniku ne’ebé Assalam lansa. Tékniku ida ne’e, halo Defeza Assalam frustradu no labele kontrola bola ho másimu. Hosi fallansu ne’ebé Assalam halo, Lalenok la husik leet. Sira aproveita dadaun. Iha minutu 39, defeza Assalam parte eskerda halo erru hasoru avansadu Lalenok, Italo Pimentel (28), árbitru foti kedas desizaun hodi fó bola falta ba Lalenok. Italo Pimentel uza oportunidade ne’e hodi lansa golu ida tan hodi muda rezultadu sai fali 2-0.

Wow! Hosi golu ne’ebé prodúz hosi Italo, jogadór nasionalidade Italiano, halo tribun estádiu atu rahun sala-sala tanba adeptu hakilar maka’as hodi festeja golu refere. Entretantu, adeptu Assalam túr ho hakmatek. Túr nahohouk. Dezesperadu.

Hakat ba segunda parte, treinadór Assalam halo mudansa ba jogu. Hosi tékniku tiki-taka muda ba tékniku bola dook (bola long-termu inglés). Ho objetivu ida atu responde ba golu rua hosi adversáriu. Maski nune’e, la’ós fásil. Lalenok la fó oportunidade ba jogadór Assalam atu bombardeia guarda rede Lalenok. Avansadu Assalam halo xutu barak maibé xutu hirak ne’e la kombinadu ho mehi. Bola dalaruma semo kle’uk. Dalaruma mós semo loos maibé salva hosi guarda rede Lalenok, Agboso Nataniel (40).

Lalenok nafatin domina bola. Jogadór Assalam difísil hetan bola. Book-aan ladi’ak. Sente izoladu, halo jogadór Assalam raan nakali. Iha minutu 49, defeza Assalam ho nervu halo erru hasoru Italo Pimente iha loos grandeia laran. Árbitru la nonook. Nia (árbitru) foti kedas desizaun hodi fó penalidade. Penalidade xutu hosi Italo. Konsege rezulta golu iha minutu 50. Nune’e, muda rezultadu sai 3-0.

Hosi kampu ninin, treinadór Assalam hamriik tane hasan. Hamriik ho laran taridu. Maibé, nia nafatin orienta jogadór Assalam. Enkuantu, treinadór Lalenok sente oin fresku. Laran la todan. Halai ba mai hodi fó orientasaun ba nia jogadór sira hodi labele halo falla iha kampu laran no kontrola bola ho di’ak nune’e bele hatama nafatin golu.

Tanba joga ho ansi, jogadór Assalam la konsege kontrola bola ho di’ak. Iha minutu 81, jogadór Lalenok, Ismael Adam, hatama tan golu ida tanba hetan oportunidade iha kampu klaran ne’ebé nia foti matan hateke ba guarda rede, Adérito Raul, nia (Adérito) sai dook tiha hosi nia fatin nune’e nia foti bola aas uituan liu Adérito nia ulun halo bola semo ba rede sai golu. Golu nakfilak ba 4-0.

Golu haat ne’e, halo jogadór Assalam dada iis sai boot. Hateke golu hanesan hateke ba foho Kablaki nia lolon. Maski sira halo esforsu atu impata no buka atu manán maibé la biban. Minutu 90 to’o dadaun. Pruit…Pruit…Pruit. Árbitu lian ona. Jogu terminadu.

Jogu refere dirije hosi árbitru Pedro Carvalho, juiz liña António Carvalho, Elísio Reis no árbitru rezerva, António Pereira.

Maski derrota ho golu ne’ebé maka’as maibé treinadór Assalam ho fuan boot konfesa katak sira tenke simu realidade tanba jogadór prinsipál Assalam na’in 4 la joga basaa hetan kartaun mean nune’e mak fó impaktu ba sira.

“Ami iha fallansu tanba ha’u-nia jogadór prinsipál na’in 4 mak hetan kartaun mean,” tenik treinadór Francisco Araújo.

Aleinde ne’e, nia lamenta ba desizaun árbitru ne’ebé foti ba jogadór Assalam sira hanesan ódiu no vingansa ida. “Ami triste mós kona-ba árbitru. Hahú kedas iha jogu primeiru sempre fó hela de’it kartaun ba ami-nia jogadór sira. Ami simu kartaun kuaze 10 resin ona. Jogadór adversáriu halo falta mai ami, árbitru la fó kartaun. Ida ne’e mak ami triste uituan tanbasá mak sai hanesan ne’e,” nia tenik ho triste.

Iha sorin seluk, treinadór Lalenok United, Yance Matmei hateten, nia sente orgullu ho rezultadu ne’ebé nia ekipa hetan no agradese boot ba Maromak. “Ha’u kontente loos. Agradese ba Maromak tanba ohin ami manán tan jogu ida,” dehan Yance.

Nia haktuir, bainhira jogadór Lalenok disiplina no halo tuir orientasaun ne’ebé nia fó, fiar katak sira sei susesu maski jogu tuir mai sei todan.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here