Inisiadór no Fundadór Movimentu LETRAS, Yazalde Manaca Sávio

DILI, 13 juñu 2019 (TATOLI)—Inisiadór no Fundadór Movimentu LETRAS hateten, inisiativa harii Biblioteka Movimentu LETRAS ne’e ho intensaun atu kontribui ba promove kultura lee, tanba iha Timor-Leste laduun iha esforsu ida maka’as atu promove no haburas kultura lee.

“Ami mós durante ne’e buka referénsia katak kultura lee iha Timor-Leste ne’e iha duni maibé ita laduun hetan. Realidade ita haree katak iha nasaun avansadu hanesan Canadá, sei iha esforsu para haburas kultura lee ne’e nafatin iha. Ida ne’e mak iha Timor-Leste, ita laduun haree no laduun sente. Entaun, maski ki’ik-oan, Movimentu LETRAS loke espasu ba ida ne’e atu haburas kultura lee,” dehan Inisiadór no Fundadór Movimentu LETRAS, Yazalde Manaca Sávio, ba Agência TATOLI liuhusi entrevista ne’ebé hala’o iha nia kna’ar fatin, Faról, Dili, kinta (13/6/2019).

Tansá tenke uza Movimentu LETRAS, nia hatán, dala barak ema interpreta sala ba liafuan ‘movimentu’ katak movimentu polítika ne’ebé iha ideolojia ne’ebé refere ba partidu A ka B. Maibé, loloos ne’e simples de’it. Movimentu ne’e refere ba movimentu lee (gerakan membaca) ka literacy moviment. LETRAS ne’e akrónimu hosi ‘Leitura ba Transformasaun Sosiál’ sai Movimentu Leitura ba Transformasaun Sosiál.

“Liafuan refere ami foti bazeia ba matenek na’in Nélson Mandela nia liafuan; ‘Edukasaun ne’e hanesan instrumentu ida poderozu tebe-tebes atu muda realidade para bele muda mundu’. Ami haree edukasaun ne’e poderozu duni maibé asaun báziku liu. Hosi edukasaun ne’e mak atividade lee,” Yazalde haktuir.

Koñesimentu modernu, nia tenik, nia hahalok báziku mak liuhusi atividade lee no lee. Lee hanesan pasu ida báziku liu-ba mudansa sosiál. Se fiar katak edukasaun iha podér ba transformasaun entaun lee  nu’udar atividade ida báziku liu-ba transformasaun sosiál.

Aleinde ida ne’e, nia hateten, inspirasaun prinsipál ida ne’ebé inspira sira mak poezia hosi poeta timoroan, Francisco Borja da Costa ninia poezia ho titulu “Hatene Hodi Hakarak”. Signifika, poezia ne’e iha nia kbiit katak bainhira hakarak halo mudansa sosiál tenke ‘hatene’ uluk tanba ‘hakarak’ atu hala’o transformasaun sosiál ne’e la mai derepente de’it.

“Ha’u hanoin ita tenke estuda no ita tenke hatene realidade ne’e hanesan ida ne’ebé? Liuhusi atividade báziku lee ne’e mak iha ‘hakarak’ atu halo mudansa no halo transformasaun sosiál. Se ita fiar ba Borja da Costa nia poezia ‘Hatene hodi Hakarak’ ne’e, ita la husu ‘tansá ita nune’e hela de’it’ maibé ita sei halo transformasaun sosiál liuhusi atividade lee,” nia esklarese.

Movimentu LETRAS ne’e, tuir Yazalde, hanesan mehi ida maibé Movimentu LETRAS hakarak sai suport system ida ba movimentu sosiál. Tanba, nia dehan, atu fini movimentu sosiál ne’e bele moris no buras iha vizaun ida ba realidade ne’e, presiza lee barak.

Entretantu, nia haktuir, programa sira ne’ebé Movimentu LETRAS hala’o diáriamente mak grupu lee novela, livru Marx nian, livru ba istória Portugal, grupu lee ba labarik sira hodi lee livru “Chega!” versaun populár. Programa semanál mak okupa jardin, programa mensál mak diskusaun meza kabuar, programa creative talk no pragama anuál maka halo festival kulturál kada tinan dala ida.

Tuir planu, Yazalde halaken, Movimentu LETRAS sei loke programa foun kona-ba aula filozofia nian, ekonomia polítika no mós iha aula teoria sosiál polítika. Programa tolu ne’e, Movimentu LETRAS tenta atu realiza iha futuru mai ne’ebé sei loke ba públiku iha nível sekundáriu to’o ensiñu superiór.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here