Embaixadór Indonézia mai Timor-Leste, Sahat Sitorus. Imajen Tatoli/Egas Cristóvão

DILI, 14 juñu 2019 (TATOLI)Embaixadór Indonézia ba Timor-Leste, Sahat Sitorus  dehan Indonézia lakohi Timor-Leste (TL) atu sai fali fatin tránzitu droga hodi esporta fali ba Indonézia.

Sahat esplika kazu kazál timoroan, JPS no As ne’ebé ekipa Badan Nasional Narkotik (BNN) Indonézia kaptura tanba lori aimoruk droga kilógrama 1.861 ne’ebé tama ba Kúpaun-Indonézia iha loron kuarta (29/05/2019) liu-ba nu’udar meiu ida hodi ajuda Governu Timor-Leste kombate rede droga ne’ebé uza timoroan hodi esporta droga ba Indonézia.

“Problema sira ne’ebé relasiona ho droga ne’e ita tenke kombate. Ita lakohi Timor-Leste sai fali fatin tránzitu ba droga. Ita hakarak serbisu ho polísia Indonézia liliu BNN tanba ami simu informasaun aimoruk sira ne’e haruka hosi li’ur mai Timor-Leste depois haruka ba Indonézia,” dehan diplomata Indonézia ne’e ba jornalista iha Aeroportu Internasionál Prezidente Nicolau Lobato, Comoro, Dili, ohin.

Nia dehan, Indonézia hakarak koopera ho Timor-Leste kombate rede droga atu labele estraga futuru juven timoroan no Indonézia.

“Ita lakohi jerasaun Timor-Leste no jerasaun povu Indonézia sai aat tanba de’it ai moruk droga,” nia afirma.

Embaixadór ne’e husu ba Komandu Polísia Nasionál Timor-Leste (PNTL) no Komandu Polísia Indonézia atu kria kooperasaun serbisu kombate rede droga iha fronteira nasaun rua hodi hametin estabilidade polítika no ekonomia.

Kona-ba akordu estradisaun, Embaixadór Sahat esplika seidauk halo akordu, tanba ne’e prosesu justisa ba kazal rua sei halo julgamentu uza lei Indonézi nian.

Embaixador Sahat rasik iha loron kinta (13/06) kalan kontatu ona Komandante Polísia Belu-Atambua informa, kazál timoroan ne’e ho kondisaun di’ak hela no parte polísia investiga ona sira hodi buka tuir autór sira ne’ebé uza sira esporta droga ba Indonézia.

“Hodikalan ha’u foin ko’alia ho Komandu Polísia Belu. Nia dehan sira na’in rua kondisaun di’ak hela hodi hein prosesu investigasaun, tanba ha’u fiar katak sira sei hetan justisa ida justu tanba karik ema ruma maka haruka sira lori ba,” nia hateten.

Sahat esplika, parte BNN sei investiga kazu ne’e kle’an ho esperansa kazál ne’e la’ós autór ba droga, maibé sira nu’udar vítima ne’ebé hetan orientasaun hosi rede droga.

Diplomata ne’e salienta, Ministériu Públiku, Polísia no BNN Indonézia prontu koopera ho Ministériu Públiku Timor-Leste, PNTL no Governu Timor-Leste hodi estabelese akordu estradisaun iha futuru.

Entretantu, Tribunál Dili liuhosi primeiru interrogatóriu hamonu medida kausaun prizaun preventiva ba arguidu JB  (Filipina) nu’udar Diretór Kompañia JVK Internasional Mover no fó Temu Identidade Rezidénsia (TIR) ba arguida M no arguidu J ne’ebé deskonfia nu’udar rede ka na’in ba aimoruk droga hodi fasilita traballadór JSP ho nia kaben AS lori droga kilógrama 1.861 hosi Dili ba Kúpaun–Indonézia.

 

Jornalista : Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here