Hadau malu bola entre jogadór FIEL no jogadór Aitana FC. Imajen Mídia LFA

DILI, 14 juñu 2019 (TATOLI)—Jogu kontinusaun Segunda Divizaun Liga Futebol Amadora (LFA) époka 2019 ohin loraik iha Kampu Demokrasia, Bairru Formosa, Dili, ekipa Aitana FC impata 0-0 ho Fitun Estudante Lorosa’e (FIEL).

Hosi rezultadu ne’ebé Aitana hetan, lori ekipa ne’e provizóriu lidera tabela klasifikasaun Grup A ho pontu 10, maski Kablaki mós pontu 10 maibe Aitana mak tenke lidera nafatin tanba Aitana ukun ho golu ne’ebé diferente ho Kablaki.

Tanba ne’e, Aitana ho Kablaki tenke hadau malu iha jogu ikus hodi buka sorte sé loos mak promovidu ba Primeira Divizaun.

Jogu ohin lidera hosi árbitru Nívio Fernandes, juiz liña Cristóvão Alves, Joviano Reis no árbitru rezerva, António de Fátima.

Fó hanoin fali katak tabela klasifikasaun provizóriu lidera hosi Aitana ho pontu 10, segundu lugár Kablaki ho pontu 10, terseiru lugár Porto Taibessi ho pontu 7, kuartu lugár FIEL ho pontu 5, Kintu lugár Cacusan ho pontu 1 no sestu lugár Zebra ho pontu zero.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here