Komunidade halo doasaun raan iha BNS, ONGV, iha ámbitu selebrasaun loron mundiál ba doasaun raan. Imajen António Gonçalves

DILI, 14 juñu 2019 (TATOLI) – Reprezentante Organizasaun Saúde Mundial (OMS) iha Timór-Leste, Sudath Peiris, hateten mundu ne’e presiza raan seguru, adekuadu ba ema sira ne’ebé presiza raan, kada segundu balun, ema ida iha fatin ne’ebé de’it presiza raan, tanba ne’e ema ne’ebé halo doasaun tenke ho kondisaun saudavel.

Sudath Peiris esplika rekerimentu báziku ne’ebé mak presiza atu prienxe hodi bele sai doadór raan mak idade entre 18 no 65, todan pelumenus kilograma 50, kondisaun saudavel bainhira halo doasaun, labele halo doasaun kuandu inus metin, mear, kabun moras ka infesaun seluk.

Nia hatutan se tattoo ka tuu tilun, inus ka seluk tan, labele halo doasaun raan durante fulan neen husi loron ne’ebé halo prosedimentu hirak ne’e.

Se tuu inus, tilun ka seluk tan hala’o husi profisionál saúde sira no laiha inflamasaun ruma, nune’e bele halo doasaun raan depois oras 12. Se doutór nehan (dentista) no halo operasaun ki’ik ruma, tenke hein durante oras 24 antes halo doasaun.

Operasaun boot tenke hein durante fulan ida, labele halo doasaun raan se laiha nivel haemoglobin mínimu ba doasaun, sei halo teste ida iha fatin doasaun.

“Tinan ne’e, loron mundiál ba doasaun raan ne’ebé selebra iha mundu tomak iha loron 14 juñu, eventu ne’e agradese voluntáriu sira, doadór sein pagamentu ba sira nia prezente raan ne’ebé salva vida no hanesan parte ida hasa’e konxiénsia atu hetan doasaun raan regulár hodi garante katak ema hotu no komunidade iha asesu ba raan no produtu raan ne’ebé seguru no kualidade nu’udar parte integradu husi kobertura saúde universal no xave komponente ba sistema saúde ne’ebé efikás”, Sudath Peiris hateten iha selebrasaun loron doasaun raan iha salaun BNS, Ospitál Nasionál Guido Valadares (ONGV), ohin.

Reprezentante OMS ne’e afirma transfuzaun raan ne’e importante hodi salva vida no hadi’a ema nia saúde, pasiente barak mak presiza raan, maibé la asesu ba raan seguru iha tempu ne’ebé loos.

Fornese raan adekuadu no seguru tenke sai hanesan parte integradu ida iha nasaun hotu-hotu nia polítika nasionál ba tratamentu saúde no mós iha infraestrutura.

OMS rekomenda atividade hotu ne’ebé relasiona no kolesaun raan, halo teste, prosesu, armazein no distribuisaun tenke iha koordenasaun iha nivel nasionál liuhusi rede fornese raan integradu no organizasaun ne’ebé efetivu.

Sistema nasionál ba raan tenke regula bazeia ba kuadru lejizlativu no polítika nasionál ba raan hodi promove implementasaun uniforme tuir padraun no konsisténsia ba kualidade no seguransa raan no produtu raan nian.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here