Ekipamentu sira bainhira rekolla raan iha banku raan. Imajen hosi google.

DILI, 14 juñu 2019 (TATOLI) – Xefe Departamentu Laboratóriu no Banku Raan Nasionál (BSN-sigla portugés), Frans Rodrigues da Silva, hateten BSN hasoru tebes difikuldade ba ekipamentu.

Tuir Frans Rodrigues da Silva ekipamentu mak sai fatór ida hodi ajuda pesoál sira hodi hala’o servisu ho di’ak no lais. Ekipamentu ne’ebé daudaun iha tuan ona, tinan 15 bainhira estabelese BSN.

Maibé prepara ona proposta ida hodi haruka ba Governu liuhusi Ministériu Saúde, nune’e mós ba parseiru internasionál Organizasaun Mundial Saúde (OMS) hodi ajuda.

“Ami nia ekipamentu sira durante tinan 15 ona, ajuda hosi Organizasaun Saúde Mundial, ami sei halo proposta ba Governu no OMS hodi fasilita ami nia servisu di’ak liután. Ami serbisu sei manuál ho ekipamentu ne’ebé difikulta tebes ami”, Frans hateten iha selebrasaun loron nasionál doasaun raan iha edifísiu BSN, ohin.

Aleinde ekipamentu, BSN mós menus rekursu umanu, nune’e mós ema oferese raan sei difisil tebes. “Ami iha funsionáriu 15 no voluntáriu na’in rua, sei presiza tan tanba ami nia servisu kobre tomak ba ospitál referral sira, inklui Rejiaun Administrativa Espesiál Oekusi Ambenu (RAEOA), no Ospitál Nasionál Guido Valadares (ONGV)”.

Sistema ne’ebé BSN utiliza bainhira hala’o atividade doasaun raan maka sei halo uluk teste sirurjia ba moras sira hanesan moras hepatitis B, C no sífilis.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here