Imajen hosi google

DILI, 14 juñu 2019 (TATOLI) – Banku ba Raan Nasionál (BSN-sigla portugés) iha ámbitu selebrasaun loron mundiál ba doasaun raan, atribui sertifikadu rekoñesimentu ba parseiru sira ne’ebé durante ne’e kontribui ona raan ba BSN kuandu menus raan.

Diretór Jerál Interinu Ospitál Nasionál Guido Valadares (ONGV), Mendes Pinto, hateten dala barak públiku sempre kestiona katak raan iha ospitál, maibé ema sira hakilar ne’e la barani atu mai hasai raan, tanba ta’uk.

Atu labele akontese estoke raan menus, durante ne’e BSN servisu hamutuk ho CVTL, Radio Televizaun Timór-Leste (RTTL) hodi mobiliza no halo advokasia ba komunidade, nune’e hatene katak raan la sosa, maibé tenke kontribui.

“Kuandu raan iha ami fornese, mas laiha tenke bolu família hodi fó, liuliu raan tipu AB ne’e ita difisil tebes”, afirma nia iha ONGV, ohin.

“Uluk ami haruka karta ba komandante Guarda Nasionál Republikana sira mai halo misaun iha ita nia rain, ami husu apoia. Agora instituisaun Estadu no parseiru sira mós voluntáriu no kuandu pasiente ruma presiza raan maka laiha, ami obriga sira nia família tenke fó, tanba ema seluk sei la fó”.

Nia akresenta: “Ha’u hakarak dehan ba ema sira hakilar raan laiha ne’e katak raan ne’e ita la sosa, se karik fábrika iha ita bele ba sosa hatudu fábrika mai fa’an raan karik ita ba sosa, maibé ida ne’e la’ós kestaun komérsiu”.

Xefe Departamentu Laboratóriu no BSN, Frans Rodrigues da Silva. Imajen António Gonçalves

Nune’e mós Xefe Departamentu Laboratóriu no BSN, Frans Rodrigues da Silva, hatutan durante ne’e BSN servisu hamutuk ho parseiru hanesan CVTL ne’ebé iha 2017, doadór hamutuk 490 hosi voluntáriu 1733. Voluntáriu ne’e sei menus, hosi família pasiente maka barak.

“Ami servisu hamutuk ho CVTL halo akordu ho instituisaun barak, universidade, seminarista, iha tinan 2018 ami hetan totál 5800, voluntáriu 3200, signifika ema ne’ebé hakarak fó ran voluntáriu ne’e aumenta, iha tinan 2019 foin rekolla dadus hosi janeiru to’o abríl”, katak Frans.

Selebrasaun tinan ne’e ho tema “Raan Seguru Ba Ema Hotu, Fó Raan Salva Ema Hotu”, atividade realiza iha resintu BSN ne’ebé lokaliza iha ONGV, partisipa hosi autoridade Parlamentu Nasionál, Komisaun F PN ne’ebé trata asuntu saúde, edukasaun no igualdade jéneru, CVTL, OMS, no instituisaun sira durante apoia doasaun raan.

Biban ne’e hala’o mós atividade doasaun raan hosi komunidade ne’ebé ho vontade rasik.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here