Imblema AMP

DILI, 14 juñu 2019 (TATOLI)—Membru Parlamentu Nasionál hosi Aliansa Mudansa ba Progresu (AMP) ho membru Governu AMP, inklui kuadru superiór partidu tolu; CNRT, PLP ho KHUNTO, ne’ebé forma AMP,   sei halo enkontru avaliasaun dezempeñu servisu durante loron rua, hosi Sábadu to’o Domingu (15-16/6/2019).

Enkontru avaliasaun ne’ebé atu hala’o iha Salaun Terra Santa, Comoro, Dili, sei halo abertura hosi porta vóz  AMP, Taur Matan Ruak nu’udar mós Primeiru-Ministru VIII Governu Konstitusionál, hamutuk ho Koordenadór Jerál AMP, Francisco Kalbuadi Lay, Primeiru Vise Koordenadór Jerál, Fidelis Leite Magalhães, Segundu Vise Koordenadór Jerál, José Agostinho da Silva, ho mós Sekretáriu Ezekutivu AMP, Francisco da Costa Guterres.

“Ami sei halo reuniaun avaliasaun durante loron rua, hahú hosi Sábadu to’o Domingu, hodi halo avaliasaun servisu entre membru Parlamentu AMP nian ho mós membru Governu AMP nian, inklui kuadru superiór partidu tolu ne’ebé forma AMP (CNRT, PLP ho KHUNTO),” informa Koordenadór Jerál AMP nu’udar mós Sekretáriu Jerál partidu CNRT, Francisco Kalbuadi Lay ba jornalista sira, ohin, iha Sede Nasionál CNRT, Dili.

Francisco Kalbuadi Lay reafirma mós katak, enkontru ne’e  nu’udar parte ida atu konsolida malu no komunika ba malu hodi haree programa servisu AMP nian durante ne’e no saida mak  AMP tenke halo iha tinan sira tuir mai atu serve interese nasaun no interese povu tuir kompromisu polítika AMP nian.

Karik sei ko’alia mós kona-ba asuntu remodelasaun, Francisco Kalbuadi Lay, ho diplomasia lia tun dehan, enkontru ne’e sei la ko’alia kona-ba remodelasaun, maibé sei ko’alia barak liu kona-ba programa AMP nian.

Iha mós ajenda atu ko’alia sobre lista membru Governu na’in sia (9) ne’ebé pendente hela no seidauk hetan tomada de posse hosi Prezidente Repúblika? Ho oin hamnasa, Francisco Kalbuadi Lay hateten, iha reuniaun nia laran mak sei haree dinámiku diskusaun.

“Partisipante enkontru AMP nian, hotu-hotu iha direitu atu hato’o saida de’it mak sira hanoin kona-ba AMP nia di’ak. Infelizmente,  husi enkontru ne’e sei hamosu rezolusaun ida no komunikadu jerál ida hosi AMP,” hateten Francisco Kalbuadi Lay.

Kona-ba prezensa prezidente AMP, Kay Rala Xanana Gusmão nian iha enkontru ne’e, Francisco Kalbuadi Lay hateten, to’o agora seidauk iha konfirmasaun direita hosi lidera másimu AMP, Kay Rala Xanana  Gusmão, atu partisipa ou lae.

“Reuniaun ne’e tuir loloos reuniaun rutina no fulan tolu-tolu ami halo hela,” informa Francisco Kalbuadi Lay.

Hosi sorin seluk, iha Parlamentu Nasionál (PN), Xefe Bankada CNRT, Duarte Nunes, informa mós katak, enkontru avaliasaun ne’e sei ko’alia kona-ba  dezempeñu servisu AMP nian durante tinan ida nia laran.

“Ami Deputadu AMP sira, membru Governu inklui Primeiru-Ministru, halo avaliasaun ba dezempeñu servisu governasaun nian durante tinan ida nia laran,” informa  Duarte Nunes, hodi responde Ajénsia TATOLI, ohin.

Duarte Nunes, akresenta asuntu importante atu ko’alia iha ámbitu enkontru maka atu halo avaliasaun ba servisu governu nian, saida maka governu halo ona no saida maka presiza halo tan ba oin.

Deputadu Duarte Nunes friza mós katak, enkontru ne’e ko’alia mós governu ne’ebé inkompletu, tanba  asuntu ne’e pertinente tebes atu aborda profunda iha enkontru, maibé depois reuniaun maka fó sai.

Tuir nia katak atu troka ka lae kandidatu membru governu ne’ebé pendente, ida ne’e kompeténsia partidu nian, maibé Primeiru-Ministru, Taur Matan Ruak, tenke fó hanoin nafatin atu buka alternativa.

Biban ne’e, Vise Prezidente Bankada Frente Revolusionáriu Timor-Leste Independente (FRETILÍN), Francisco Miranda Branco, apresia no konkorda enkontru membru governu sira ne’ebé xefia hosi Primeiru-Ministru inklui Deputadu Bankada AMP sira atu halo avaliasaun dezempeñu servisu, nune’e bele sukat kapasidade dezempeñu ba kada ministériu nian pozitivu ka lae.

Jornalista     : Zezito Silva

Editór           : Francisco Simões

HAKEREK NO HATÁN

Please enter your comment!
Please enter your name here