Ministru Reforma Lejizlativa no Asuntu Parlamentár no Ministru Agrikultura no Peska interinu, Fidelis Manuel Leite Magalhães, Ministru Transporte no Komunikasaun, José Agostinho da Silva, Ministra Konselleira no Adjunta Xefe Misaun Embaixada Tailándia, Acharapan Yavaprapas no Reprezentante FAO ba Timor-Leste no Indonézia, Stephen Rudgard, foto hamutuk ho ekipa téknika husi Tailándia no ekipa Diresaun Jerál Peska, iha lansamentu ba peskiza konjunta ba rekursu peska mariña iha Portu Dili, Kinta, (13/06/2019). Imajen/Egas Cristovão.

DILI, 13 juñu 2019 (TATOLI)-Governu Timor-Leste liuhosi Ministériu Agrikultura no Peska (MAP) hamutuk ho Governu Reinu Tailándia, ohin, lansa peskiza konjunta ba rekursu peska mariña no ambiente iha tasi territoriál no Zona Ekonomia Eskluzivu (ZEE) Timor-Leste.

Ministru Reforma Lejizlativa no Asuntus Parlamentares no Ministru Agrikultura no Peskas Interinu, Fidelis Manuel Leite Magalhães, entrega simbolikamente souvenir ró ba Ministra Konselleira no Adjunta Xefe Misaun Embaixada Tailándia Acharapan Yavaprapas, iha Salaun Arbiru Portu Dili, Kinta, (13/06/2019). Imajen/Egas Cristovão

Atividade peskiza ne’e halo ba daruak nian tanba antes ne’e Governu rai rua estabelese ona kooperasaun téknika iha 2003 iha área peska no akuakultura  ne’ebé ikus mai iha 2005, país rua ne’e realiza ona peskiza preliminár iha área peska iha tasi-mane Timór-Leste nian no peskiza ba agora ne’e hahú hosi 8 juñu-20 jullu 2019.

Diretór Jerál Peska MAP, Acácio Guterres, informa  peskiza dahuluk ne’ebé halo antes ne’e seidauk kompletu tanba dadus preliminár ne’ebé seidauk iha baze dadus iha ne’ebé forte no ho ró peskiza ba daruak ne’e sei halo kompletu liu.

“Aban bainrua kuandu fulan rua (juñu-jullu) hotu, nia rezultadu sei fó matadalan ida ba Timor-Leste oinsá halo aprezentasaun no jestaun ba ita-nia rekursu para bele iha sustentabilidade iha futuru,” tenik  Acácio Guterres, iha ámbitu lansamentu ne’e iha Portu Dili.

Aléinde ne’e atu rekursu ne’e labele aproveita de’it hosi jerasaun agora, maibé oinsá mak halo konservasaun para jerasaun tuirmai bele aproveita nafatin.

Peskiza ba rekursu tasi ne’e sei kobre hotu iha parte norte no súl, maibé Rejiaun Administrativa Espesiál Oe-Cusse-Ambeno (RAEOA) mak seidauk.

Orsamentu ba peskiza ne’e, tuir Diretór Jerál katak hosi parte Governu nian lahatene nia montante, maibé ne’e osan boot no hosi parte Food and Agriculture Organization (FAO) apoia rihun $60 atu kobre hosi parte norte hosi Batugadé to’o Lautein.

Ministru Reforma Lejizlativa no Asuntu Parlamentár no Ministru Agrikultura no Peska interinu, Fidelis Leite Magalhães, hatete lansamentu ró peskiza hodi halo peskiza mariña ba rekursu peskeiru iha tasi Timór nian, bele hatene loloos Timor-Leste nia estoke en termu diversidade no abundánsia, nune’e bele iha dadus loloos atubele maneja rekursu sira ne’e sustentavel, hodi bele kontribui ba reseita nasaun nian no hadi’ak seguransa ai-han no nutrisaun iha Timor-Leste.

“Ita rekoñese katak Governu Tailándia no ajénsia FAO iha kooperasaun di’ak tebes ho Ministériu Agrikultura no Peska durante ne’e. No ba kooperasaun hodi realiza survey ida ne’e, ha’u hodi Oitavu Governu Konstitusionál nia naran hato’o obrigadu ua’in ba Governu Tailándia no ajénsia FAO, hein katak kooperasaun ne’e bele kontinua nafatin iha futuru ba benefísiu mútua”.

Ministru dehan peskiza ida ne’e ho objetivu atu halo estudu rekursu peska nian hodi hatene estoke no biomass, kompozisaun espésie, distribuisaun no númeru ne’ebé bele kaer iha tasi, parte norte no súl. Estudu karaterístika biolójiku ba espésie ikan, oceanography, no fatór hydrobiological.

Aléinde ne’e, ajuda Governu Timor-Leste liuhosi MAP hodi formula matadalan ida ba protesaun no dezenvolvimentu sustentavel ba rekursu iha tasi-laran no fó kapasitasaun ba tékniku sira ne’ebé haknaar an iha Diresaun Jerál Peska nian sobre asuntu relevante sira iha peskiza mariña nian durante tempu peskiza.

Ministra Konselleira no Adjunta Xefe Misaun Embaixada Tailándia, Acharapan Yavaprapas, hatete, ida ne’e oportunidade di’ak atu lansa projetu ne’e.

Acharapan Yavaprapas hatutan, bazeia ba suporta iha peskiza konjunta ba rekursu peska mariña no ambiente iha tasi territoriál Timor-Leste, Tailándia prontu atu treinu ofisiál Timor-Leste.

Peskiza ba rekursu mariña ne’e sei halo ho ró naran R.V Chulabhorn, R.V Fishery Research No.3 Department of Fisheries Bangkok.

Jornalista      : Maria Auxiliadora

Editór            : Francisco Simões

HAKEREK NO HATÁN

Please enter your comment!
Please enter your name here