Diretór Jerál Peskas (MAP) Acacio Guterres. Imajen Egas Cristovão

DILI, 13 juñu 2019 (TATOLI)-Diretór Jerál Peska Ministériu Agrikultura no Peska (MAP), Acácio Guterres, informa, timoroan na’in-neen, kompostu hosi feto rua no mane haat, envolve iha peskiza konjunta ba rekursu peska mariña no ambiente iha tasi territoriál no Zona Ekonomia Eskluzivu (ZEE) Timor-Leste.

“Hosi timoroan, ita envolve iha peskiza ida ne’e ita mós promove feto Timor-Leste na’in-rua no mane haat, sira fulan rua tomak sei halo peskiza iha tasi-mane to’o tasi feto, depois sira mós akompaña análize dadus bá iha Tailándia, oinsá mak atu halo análize dadus iha laboratóriu,” informa  Acácio Guterres, ohin, iha Portu Dili, iha ámbitu lansamentu ba peskiza konjunta ida ne’e.

Timoroan na’in-neen ne’e, hosi Diresaun Jerál Peska MAP iha lima no hosi Universidade Nasionál Timor Lorosa’e (UNTL) na’in-ida ne’ebé halo peskiza hamutuk ho tékniku hosi Tailándia ne’ebé sei halo peskiza ne’e ho ró naran R.V Chulabhorn, R.V Fishery Research No.3 Department of Fisheries Bangkok.

Acácio Guterres dehan, hafoin halo tiha peskiza ne’e durante fulan rua (juñu-jullu), antes fila bá Tailándia, sei tuur hamutuk fali halo aprezentasaun saida mak durante ne’e halo.

“Depois mak ita timoroan, tanba limitasaun orsamentu ita sei haruka ema na’in rua ka tolu para akompaña prosesu dadus ne’e iha Tailándia to’o fó sai nia rezultadu”.

Diretór Jerál ne’e dehan, ba peskiza ida ne’e nia vantajen boot tebes ba Timor-Leste, tanba dadus ne’ebé prodús sai matadalan ida oinsá mak atu jere rekursu peskeiru ne’e ba futuru. Tanba dadus sira ne’ebé durante ne’e halo barak liu kualitativu, entaun ho peskiza ne’e sei kompleta tan dadus kuantitativu ne’ebé bele sai hanesan gia hodi halo jestaun ba rekursu peskeiru atubele iha sustentabilidade ba oin.

Jornalista      : Maria Auxiliadora

Editór            : Francisco Simões

 

 

HAKEREK NO HATÁN

Please enter your comment!
Please enter your name here