Prezidente Parlamentu Nasionál, Arão Noe de Jesus Amaral. Imajen/Espesiál.

DILI, 13 juñu 2019 (TATOLI)– Presiza duni iha lei atu regulariza liña pornográfiku  ne’ebé espalla livre iha media sosiál (Facebook). Ho nune’e, Prezidente Parlamentu Nasionál (PPN), Arão Noe de Jesus Amaral,  subliña katak, atu halo lei tenke iha inisiativa hosi Governu no Parlamentu Nasionál (PN).

“Atu halo lei, Estadu tenke toma inisiativa, liuhosi fatin rua maka hosi Governu tenke halo proposta lei no parlamentu liuhosi bankada parlamentár tenke halo projetu lei,” esplika Arão Noe de Jesus Amaral ba Ajénsia TATOLI hafoin halo abertura semináriu kona-ba ema ho defisiénsia, ohin, iha salaun Ministériu Solidariedade Sosiál no Inkluzaun.

Lider másimu órgaun lejizlativa ne’e esklarese katak, mundu modernu, ema ki’ik to’o boot, feto ka mane, hothotu asesu mídia sosiál, iha liña Facebook mós iha video edukativu no la edukativu, nune’e maka Timor-Leste presiza lei atu regula video ne’ebé la edukativu.

“Ita presiza halo lei hodi regulariza mídia sosiál,” afirma Prezidente PN, Arão Noe de Jesus Amaral.

Nia fó ezemplu, iha nasaun barak; iha Indonézia la asesu tanba liña pornográfiku la hatama iha mídia sosiál, iha Timor-Leste atu blokeiu liña ida ne’e tenke iha lei atu fó kompeténsia ba Governu hodi kontrola.

Kuandu lei la iha, tenik Arão Noe,  signifika la iha ema ida maka atu kontrola, entaun Estadu tenke halo lei ida atu fó podér ba órgaun ida atu kontrola liña pornográfiku ne’ebé publika iha Facebook.

Jornalista      : Zezito Silva

Editór            : Francisco Simões

HAKEREK NO HATÁN

Please enter your comment!
Please enter your name here