Prezidente Parlamentu Nasionál, Arão Noé de Jesus Amaral. Imajen/ Antonio Goncalves

DILI, 13 juñu 2019 (TATOLI) – Prezidente Parlamentu Nasionál (PPN), Arão Noe de Jesus Amaral, husu ba ema ho defisiénsia atu labele sente marjinalizadu tanba iha konstituisaun garante ema ho defisiénsia nia direitu hanesan ema hotu.

“Ha’u mai halo abertura ba sesaun semináriu nasionál, ema ho defisiénsia, ha’u fó parabéns ba sira no ha’u husu sira atu labele sente marjinaliza iha Estadu ida ne’e,” hatete PPN Arão Noe  de Jesus Amaral, iha ámbitu abertura semináriu ne’e, ohin, iha Ministériu Solidariedade Sosiál no Inkluzaun (MSSI).

Iha Konstituisaun Repúblika Demokrátika Timor-Leste (RDTL), artigu 21, iha aliña dahuluk ko’alia kona-ba sidadaun ne’ebé iha defisiénsia fíziku eh mental iha direitu no mós obrigasaun hanesan sidadaun sira seluk, maibé sira sei la halo knaar hirak ne’ebé sira labele hala’o tanba de’it sira nia defisiénsia. Liña daruak ko’alia kona-ba Estadu, bainhira bele, promove protesaun ba sidadaun sira ne’ebé iha defisiénsia, tuir lei haruka.

Lider másimu órgaun lejizlativa ne’e friza katak ema ho defisiénsia sira sente marjinaliza tanba edifísiu públiku sira la fó fasilidade ba sira atu asesu no opsaun seluk hanesan edukasaun.

Preokupasaun sira ne’e, Arão Noe  de Jesus Amaral  hatutan, sai matéria ba governu kuandu iha planu orsamentu ba konstrusaun edifísiu públiku tenke konsidera espasu atu defisiente sira bele hetan asesu no eskola sira mós tenke kria ekipamentu hodi sira asesu hanesan sidadaun.

“Preokupasaun hirak ne’e pertinente atu governu fó atensaun hodi fó asisténsia ba ema ho defisiénsia,” hatete Araõ Noe de Jesus Amaral.

Iha biban hanesan, Diretór Ezekutivu Asosiasaun Defisiénsia Timor-Leste (ADTL), Sezario da Silva, konsidera, ema ho defisiénsia sira nia problema maka ambientál, ne’ebé foka liu ba asesibilidade fíziku sira. Ezemplu;  edifísiu públiku sira hotu labele asesu ba ema defisiénsia, ema ho kadeira roda sei labele ba, transporte públiku hanesan mikrolete labele tula ema ho kadeira roda.

“Ne’e maka ita nia asesibilidade sai preokupasaun boot hodi rezulta defisiente sira izola an,” hatete Sezario da Silva.

Seluk tan, Sezario hatutan,  atitude, ema barak hanoin defisiente sira la halo buat ida, hanoin dehan ba halo tratamentu de’it maibé ida ne’e la loos.

“Ita iha polítika barak ne’ebé atu garante direitu ema ho defisiénsia nian, maibé ita preokupa nia implementasaun ne’ebé maka la másimu,” afirma Sezario da Silva..

Atu responde situasaun hirak ne’e, afirma Sezario da Silva, katak ADTL nafatin halo advokasia ba órgaun kompetente sira atu haree sira nia responsabilidade, asesibilidade no ADTL mós halo advokasia ba infraestrutura liuhosi petisaun atu haree asuntu ne’e.

Númeru defisiente sira iha Timor-Leste, tuir sensu 2015 hamutuk 38.000, hosi hirak ne’e númeru boot liu maka deferénsia matan ho total kuaze ema 2.000.

Jornalista      : Zezito Silva

Editór            : Francisco Simões

HAKEREK NO HATÁN

Please enter your comment!
Please enter your name here