Prezidente Parlamentu Nasionál, Arão Noé de Jesus Amaral.

DILI, 13 juñu 2019 (TATOLI) – Prezidente Parlamentu Nasionál (PPN), Arão Noe de Jesus Amaral, husu ba Governu atu aprezenta proposta lei kona-ba ratifikasaun konvensaun direitu ema ho defisiénsia.

“Asuntu ratifikasaun konvensaun direitu ba ema ho defisiénsia, ida ne’e polítika Governu nian, Governu maka tenke hola inisiativa hodi aprezenta mai parlamentu,” esplika PPN Arão Noe de Jesus Amaral, ba Ajénsia TATOLI, ohin, iha Salaun Ministériu Solidariedade Sosiál no Inkluzaun (MSSI).

Arão Noe de Jesus Amaral, esklarese  katak, parlamentu labele hola inisiativa rasik hodi halo lei ne’e, ida ne’e kompeténsia Governu nian, kuandu Governu haruka mai ona parlamentu atu semana ida ka rua bele rezolve kedan.

Prezidente Parlamentu Nasionál, Arão Noe de Jesus Amaral nia prezensa iha abertura semináriu Ema ho Defisiénsia ne’e hodi haree preokupasaun sira  hodi fó hanoin fali ba ministériu relevante atu ratifika konvensaun direitu ba ema ho defisiénsia, estabelese konsellu nasionál ba ema ho defisiénsia no implementa polítika sira durante ne’e.

Iha Konstituisaun Repúblika Demokrátika Timor-Leste (RDTL), artigu 21, iha aliña dahuluk ko’alia kona-ba sidadaun ne’ebé iha defisiénsia fíziku eh mental iha direitu no mós obrigasaun hanesan sidadaun sira seluk, maibé sira sei la halo knaar hirak ne’ebé sira labele hala’o tanba de’it sira nia defisiénsia. Liña daruak, ko’alia kona-ba Estadu, bainhira bele, promove protesaun ba sidadaun sira ne’ebé iha defisiénsia, tuir lei haruka.

Jornalista      : Zezito Silva

Editór            : Francisco Simões

 

 

HAKEREK NO HATÁN

Please enter your comment!
Please enter your name here