Prezidente Parlamentu Nasionál, Arão Noe de Jesus Amaral. Imajen/António Gonçalves

DILI, 13 juñu 2019 (TATOLI)–Primeiru-Ministru (PM), Taur Matan Ruak, iha loron 1 jullu, tinan ne’e, sei ba Parlamentu Nasionál (PN) atu hatan preokupasaun Bankada FRETILIN nian kona-ba polémika lighthouse no mós Sistema Government Resource Planning (GPR) iha Oe-Cusse.

“Ita hein governu sei oferese informasaun konkretu iha loron 1 jullu, hodi hatán ba preokupasaun Bankada FRETILIN nian ba asuntu lighthouse inklui Sistema Government Resource Planning ou Planeamentu Rekursu Umanu (GPR),” informa Prezidente PN, Arão Noe de Jesus Amaral, ba Ajénsia TATOLI, ohin, hafoin halo abertura ba semináriu kona-ba ema ho defisiénsia iha salaun Ministériu Solidariedade Sosiál no Inkluzaun, Caicoli, Dili.

Arão Noe klarifika katak, molok Xefe Governu mai PN, nia sei disponibiliza hodi haruka karta mai hafoin iha 1 jullu maka halo debate kona-ba problema lighthouse no atu monta sistema GPR iha Oe-Cusse.

“Asuntu rua ne’e maka Primeiru Ministru informa ona katak sei haruka informasaun eskrita mai uluk parlamentu atu deputadu sira entende hafoin 1 jullu maka iha debate hodi esklarese,” hateten Arão Noe de Jesus Amaral.

Kona-ba Governu haruka rekursu ba kompañia lighthouse, Arão Noe,  konsidera rumoris de’it, maibé formalmente seidauk.

“Se ida ne’e maka inisiativa governu nian atu hetan justisa ba prosesu ne’e, ita iha direitu.Informasaun konkretu ami seidauk rona, ha’u komenta de’it informasaun sira legál ne’ebé informa hosi governu mai parlamentu,” hateten Arão Noe.

Hanesan nasaun independente no moris iha nasaun globalizasaun, tenik Arão Noe, Timor-Leste iha direitu kuandu iha violasaun ruma ne’ebé afeta ba interese Estadu no governu iha devér atu lori prosesu ba judisiál hodi buka solusaun.

Jornalista      : Zezito Silva

Editór            : Francisco Simões

 

HAKEREK NO HATÁN

Please enter your comment!
Please enter your name here