Primeiru-Ministru, Taur Matan Ruak ho Prezidente Repúblika, Francisco Guterres Lú Olo. Imajen/António Goncalves

DILI, 13 juñu 2019 (TATOLI)-Primeiru-Ministru, Taur Matan Ruak ho Prezidente Repúblika, Francisco Guterres Lú Olo, hahú halo diskusaun hodi buka solusaun ba kazu kazál Timoroan ne’ebé autoridade  Alfándega  Indonézia nian prende tanba lori droga.

Kazál Timoroan ne’e, Alfándega Indonézia nian prende iha fronteira Monta-Ain, Distritu Belu, Provínsia Kupaun, Timor Osidentál (NTT-sigla indonézia) iha loron 29 maiu, foin lalais ne’e, bainhira lori droga atu ba fa’an iha Kupaun.

Primeiru-Ministru Taur Matan Ruak, dehan, durante diskusaun ho Prezidente Repúblika, preokupa mós kona-ba  akordu estradisaun ne’ebé sai problema no difikulta Timor-Leste atu ko’alia ho Indonézia atu defende no lori fila kazál timoroan mai rai laran.

“Ami rua prezidente repúblika ko’alia hela asuntu ida ne’e. Primeiru, ita laiha akordu estradisaun, segundu, ita nia advogadu iha ne’e labele ba iha ne’ebá, (Indonézia-red) atu defende sira na’in rua,” hateten PM Taur Matan Ruak, hodi responde jornalista sira, ohin, iha Palásiu Prezidensiál, Bairru-Pité, Dili.

Maske Governu enfrenta hela difikuldade kona-ba akordu ne’e, Taur Matan Ruak, fó  ona konsellu ba Xefe Estadu atu bolu Prokuradór Jerál Repúblika atu hetan solusaun balun ba kazu ne’e.

Taur informa, ohin  dadeer mós simu karta balun hosi advogadu Timoroan balun ne’ebé fó hanoin ba Governu kona-ba kazu ne’e maibé sei kontinua akompaña prosesu ne’e.

“Ha’u fó konsellu ba Prezidente Repúblika para bolu took Prokuradór Jerál para saida maka ita bele halo no ohin dadeer ha’u foin simu karta ida hosi advogadu balun hatete katak advogadu iha Indonézia  bele, maibé nia implikasaun ne’e oinsá no tuir lei saida maka ita tenke halo,” hatete Primeiru-Ministru, Taur Matan Ruak.

Jornalista      : Agapito dos Santos

Editór            : Francisco Simões

HAKEREK NO HATÁN

Please enter your comment!
Please enter your name here