Komandante Jeral PNTL, Komisáriu Faustino da Costa. Imajen/Antonio Gonçalves

DILI, 13 juñu 2019 (TATOLI)-Durante fulan maiu to’o inísiu juñu, tinan ne’e, Polísia Nasionál Timor-Leste (PNTL), rejista kazu insidente, asidente no krime hamutuk 408.

“Maiu to’o 13 Juñu, rejista kazu 408. Kazu sira ne’e hanesan asaltu entre grupu arte marsiál, insidente, asidente tráfegu, violénsia doméstika no kazu soe bebé la’ós akontese iha Dili de’it,  maibé akontese mós iha Covalima,” informa  Komandante Jerál PNTL,  Komisáriu Faustino da Costa,  ba Jornalista sira hafoin halo enkontru semanál ho Prezidente Repúblika, Francisco Guterres Lú Olo, ohin, iha Palásiu Prezidensiál, Bairru-Pité, Dili.

Iha sorumutuk ne’e, Prezidente Repúblika enkoraja Komandu PNTL atu kontinua koordena ho FALINTIL-Forsa Defeza Timor-Leste (F-FDTL) atu halo atuasaun ba kazu asaltu malu entre grupu ne’ebé kontinua sai preokupasaun iha povu, liu-liu komunidade iha kapitál Dili.

Prezidente Repúblika husu ba PNTL atu halo atuasaun iha situasaun sira ne’e  ho koordenasaun ho ita nia  F-FDTL,” tenik Komisáriu Faustino da Costa.

Oportunidade ne’e Komisáriu Faustino da Costa apela ba juventude atu kolabora prevene konflitu hodi kontribui ba estabilidade nasionál.

Jornalista      : Agapito dos Santos

Editór            : Francisco Simões

HAKEREK NO HATÁN

Please enter your comment!
Please enter your name here