Emprezáriu Jape Kong Chu

DILI, 12 juñu 2019 (TATOLI)Emprezáriu Jape Kong Chu, ohin, hamutuk ho advogadu privadu hakat ba Gabinete Primeiru-Ministru, hodi husu tulun ba Governu Timor-Leste atu segura siguransa ba fatin investimentu turizmu ne’ebé nia parte hahú dezenvolve iha tasi ibun no foho leten área Dolok-oan, Aldeia Três Fatukama, Suku Metiaut, Postu Administrativu Kristu Rei, Munisípiu Dili.

Na’in ba proprietáriu Timor Plaza ne’e hato’o keixa ba Primeiru Ministru, Taur Matan Ruak, tanba iha emprezáriu timoroan balun kontinua halo ameasa ba Jape kona-ba problema rai ba investimentu ne’e.

Jape dehan, tinan lima ona nia investe osan hadi’a dezenvolvimentu turizmu ba rai iha Hera nian, maibé nia hetan ameasa nafatin hosi ema balun.

“Ha’u ba ne’ebá ema sira duni ha’u. Agora ha’u mai keixa ba Primeiru-Ministru, Taur Matan Ruak, suporta ha’u atu kontinua investimentu ne’e, tanba ha’u sente la seguru,” dehan Jape ba jornalista hafoin aprezenta keixa ne’e ba Gabinete Primeiru-Ministru iha Palásiu Governu.

Nia hatutan, rai ne’ebé nia uza hodi halo investimentu ne’e halo kontratu arendamentu ho Estadu. Tanba ne’e, nia husu atu governu koloka PNTL hodi fó seguransa ba investimentu ne’ebé nia kuda iha ne’ebá.

“Ha’u husu mós ba governu tau polísia halo seguransa iha ne’ebá. Se Estadu lakohi ha’u ba ona,” Jape sujere.

Iha fatin hanesan, Advogadu Jape Kong Chu, José Camões dehan sira aprezenta keixa ne’e ba Gabinete Primeiru-Ministru hodi hato’o ba Xefe Governu Taur bele tau konsiderasaun hodi asegura seguransa ba investimentu turizmu iha Kristu Rei ba to’o Hera nian.

“Avó Jape intrega ona karta ba primeiru-ministru no primeiru-ministru fó ona resposta pozitivu ba investimentu ne’e, maibé avó hakarak rona mós Xefe Governu Taur nia apoiu hodi ko’alia direta para asegura seguransa,” José haklaken.

Nia salienta, rai Estadu ne’ebé Jape uza hodi halo investimentu ba turizmu kontratu ho governu, maibé sei iha ema balun kontinua ameasa no tenta boikota investimentu turizmu ne’ebé fó serbisu ba timoroan rihun.

 

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here