Primeiru-Ministru, Taur Matan Ruak, akompaña hosi Diretór Ezekutivu Institutu Bambú I.P, Sabino Rua observa direta serbisu produsaun bambú Tibar, kinta (13/06). Imajen Tatoli/Eugénio Pereira

TIBAR, 13 juñu 2019 (TATOLI)—Primeiru-Ministru (PM), Taur Matan Ruak promote hahú tinan 2020 ba oin sei investe osan hodi hadi’a kondisaun infraestrutura no hasa’e rekursu umanu Institutu Bambú Tibar I.P sai indústria ki’ik ne’ebé modernu liu-tan hodi hala’o nia serbisu prodúz mobiliáriu oioin ne’ebé uza produtu bambú (au) Timor.

PM Taur husu atu Institutu Bambú hahú prepara ona planu mestre ida feitu hodi aprezenta ba nia hodi prevee osan iha orsamentu jerál Estadu (OJE) 2020.

Taur konsidera Institutu Bambú Tibar iha ona kondisaun, maibé presiza hadi’a liu-tan para institutu ne’e kria kampu serbisu barak liu-tan ba timoroan la’ós de’it serbisu iha Tibar, maibé ba futuru alarga tan institutu ne’e iha munisípiu balun ne’ebé iha bambú barak hanesan Ermera, Baucau, Lautém, Viqueque no Manufahi.

“Ha’u haree evolusaun di’ak no ha’u apresia ba imi-nia serbisu. Ha’u hakarak imi hadi’a fatin ne’e. Imi bele prepara konseitu ida feitu, ha’u sei haruka arsitektu mai serbisu ho imi dezeñu profisionál no planu mestre ida di’ak para ha’u hakarak iha orsamentu 2020 tau dadaun ona osan hadi’a imi-nia kondisaun,” tenik Taur durante hala’o vizita ba serbisu fatin Institutu Bambú, Tibar, Postu Administrativu Bazartete, Munisípiu Liquiçá, ohin.

Nia dehan, nia vizita ona fatin ne’e ba dala rua no observa katak presiza hadi’a kondisaun ijiene atu proteje saúde serbisu na’in sira no bele atrai mós vizitante sira barak liu-tan.

Tuir Xefe Governu katak bainhira ambiente fatin serbisu moos no organizadu bele fó valór pozitivu ba serbisu hotu-hotu hetan susesu. PM mós sujestaun katak ba oin bele harii kantina ki’ik no simples ida, nune’e vizitante sira ba vizita bele sosa buat ruma atu osan ne’e bele rai ba nesesidade institutu nian.

PM mós husu atu kria kondisaun ba traballadór na’in 63 ne’ebé hala’o serbisu iha Institutu Bambú ne’e liliu proteje seguransa ba serbisu—serbisu tenke iha farda no kuidadu sira nia saúde hodi serbisu livre, bele deskansa, han no hemu di’ak.

Tuir planu, iha tempu besik, PM sei orienta ekipa tékniku sira sei ba Tibar hodi halo koordenasaun di’ak liu-tan ka koopera ho Institutu Bambú Tibar no parseiru sira USAID, GTZ no seluk-tan atu hahú dezeñu programa planu mestre 2020 to’o 2021 para bele hadi’a kondisaun institutu ne’e.

Taur hatutan, institutu ne’e labele orienta halo de’it negósiu, maibé investe mós iha rekursu umanu. Tanba, bainhira rekursu kualifikadu institutu ne’e sai institutu indústria boot, bele fa’an mós produtu ne’e ba rai li’ur, kria kampu serbisu no fó osan ba agrikultór sira.

“Ba ha’u, la importante imi atu fó osan ba Estadu. Ha’u kontente liu imi fó serbisu no osan ba ita- nia povu sira,” nia informa.

Nia afirma, governu sei apoia formasaun ba joven sira iha kada munisípiu hodi muda ema nia mentalidade sai disiplinadu, atendimentu ne’ebé di’ak no respeita irárkia serbisu. “Ita bele halo estrada, ponte, maibé investe ba rekursu ema ne’e imoportante,” nia afirma.

Iha biban hanesan, Diretór Ezekutivu Institutu Bambú Tibar, Sabino Rua agradese ho vizita Xefe Governu hodi haree kondisaun no apoiu atu investe iha institutu ne’e.

Nia dehan, sira sei koopera ho parseiru sira hotu oinsá maka kria planu mestre ida feitu hodi aprezenta ba PM hodi prevee iha OJE 2020.

“Ami agradese ba vizita ne’e. Ami sei kria planu no programa tuir orientasaun hodi hadi’a institutu ne’e di’ak liu-tan,” tenik Sabino.

Durante Institutu Bambú Tibar harii, nia esplika, fó ona serbisu ba traballadór timoroan hamutuk ema na’in 63 ne’ebé maioria hetan formasaun iha rai li’ur iha área serbisu oioin.

Nia salienta, institutu ne’e mós kria kooperasaun ho grupu komunidade sira hodi kuda bambú hamutuk ektare 100 ne’ebé lokaliza iha  Ermera, Viqueque, Baucau, Manufahi no fatin seluk. Institutu ne’e fó mós treinamentu ba joven no kria kampu serbisu ba traballadór 63 hodi prodúz au kabelak no mobiliáriu, kurtina, artezenatu, sate kesak no biti ne’ebé fa’an iha Loja Tibar.

 

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here