Kompozisaun Reseita Domestika. Imajen: Ministeriu Finansa

DILI, 13 juñu 2019 (TATOLI) – Governu liuhusi Ministériu Finansa (MF) konsege kobre reseita doméstika millaun $42,1, ne’ebé reprezenta 21% husi previzaun ho totál millaun $198,6 iha trimestre dahuluk 2019.

Totál kobransa iha trimestre dahuluk engloba millaun $28,7 husi Reseita Fiskál no millaun $13,4 husi Reseita naun-fiskál, inklui mós reseita ne’ebé kobre husi Institutu Autónomu sira.

Persentajen ne’e iha redusaun 12% kompara ho trimestre dahuluk tinan 2018, ne’ebé konsege kobre millaun $47,9.

Redusaun iha reseita doméstika jerál menus tanba kobransa iha reseita fiskál, maske nune’e kobransa reseita globál naun-fiskál iha trimestre dahuluk, inklui institutu autónomu sira aumenta husi millaun $12,5 iha tinan 2018, ba millaun $13,4 iha tinan 2019.

Previzaun Governu ba reseita doméstika iha tinan tomak 2018 hamutuk millaun $188,8, enkuantu iha tinan 2019, Governu iha previzaun atu kobre millaun $198,6.

Dadus informasaun ne’e, divulga iha relatóriu ezekusaun orsamentál primeiru trimestre, Ministériu Finansa (MF), Diresaun Jerál Tezouru, Ajénsia TATOLI asesu, kinta (13/06).

“Laiha tranferénsia husi Fundu Petrolíferu durante trimestre dahuluk, no uza de’it saldu disponivel iha kaixa. Hafoin kontabiliza reseita ne’ebé hetan iha trimestre dahuluk, sei rezerva iha kaixa hamutuk millaun $96,5 ne’ebé sei bele kobre nesesidade durante trimestre dahuluk,” refere tan iha relatóriu ne’e.

Durante fulan tolu dahuluk tinan 2019 konsege transfere millaun $70,1 ba Fundu Infraestrutura, millaun $5 ba Fundu Dezenvolvimentu Kapitál Umanu (FDCH-sigla portugés), millaun $29,1, ba Institutu Autónomu (iha reseita no laiha reseita) no millaun $10,1 ba munisípiu sira.

Entretantu, ezekusaun orsamentál to’o finál trimestre dahuluk ba verba Todo o Governo inklui Fundu Espesiál, Institutu Autónomu no empréstimu hamutuk millaun $152,6, ne’ebé korresponde 10% husi total Orsamentu Jerál Estadu (OJE) 2019 ho total millaun $1.482, esklui empréstimu esternu.

OJE tinan 2019 rasik promulgadu hanesan Lei nú.2/2019 7 fevereiru no Governu konsege la’o ho rejime duodesimál durante fulan janeiru 2019, ho totál Dotasaun Orsamentál Temporária (DOT) hamutuk millaun $71,9, ne’ebé engloba Saláriu no Vensimentu millaun $16,7, Bens no Servisu millaun $29 no Transferénsia hamutuk millaun $26,2.

Nune’e trimestre dahuluk 2019, inklui ona ezekusaun DOT durante fulan janeiru iha ezekusaun finál husi totál orsamentu.

Informasaun relevante ba notísia ne’e: https://www.mof.gov.tl/wp-content/uploads/2019/05/Relatorio-de-Execucao-Orcamental-Para-o-Primeiro-Trimestre-2019.pdf

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here