Bispu Dioseze Dili, Mgr. Virgílio do Carmo da Silva, SDB. Imajen/Espesiál

DILI, 13 juñu 2019 (TATOLI)—“Ohin oportunidade atu agradese. Obrigadu tanba St. António hanorin no hatudu ona iha nia moris sai masin no sai naroman. Oinsá atu sai masin no oinsá atu sai naroman? Ita tenke haklaken no hakle’an liu-tan ita-nia fiar iha Nai Maromak,” dehan Bispu Dioseze Dili, Don Virgílio do Carmo da Silva, SDB.

Don Virgílio haklaken, bainhira Nai Jesus Kristu uza símbolu rua sai masin no naroman tanba iha posibilidade atu lakon sira-nia funsaun sira. Hanesan masin bele lakon nia mér no naroman mós labele fó tan naroman.

“Jesus bolu atensaun espesiál ba eskolante sira ninia misaun iha rai ida ne’e mak sai masin. Iha mundu ida ne’e buat ida ne’ebé uniku no bele dehan mós indispensave tanba masin indispensavel atu fó sabór ba aihan,” líder Igreja Katólika ne’e haklaken.

Tuir nia, sarani ida ne’ebé laiha kapasidade atu fó sasin kona-ba nia fiar, kona-ba ninia Uma-Kreda iha ema seluk nia oin, nia sarani fó sasin ne’e indispensável. Labele haketak iha sarani sira-nia moris. Maibé kna’ar profeta, nailulik no liurai ne’ebé sarani sira simu iha loron batizmu nian, sei hametin liu-tan iha sakramentu krizma.

“Ba alin doben sira 500 resin ne’ebé atu simu sakramentu krizma, tau ida ne’e iha imi-nia neon. Atu sai sasin, sarani ida, joven Katóliku ida, tenke lori ida ne’e. Hametin liu-tan sakramentu krizma ho prezente espíritu santu ninian,” Don Virgílio hateten iha ninia ómilia ba sarani sira no krizmadu na’in 500 resin ne’ebé simu Sakramentu Krizma iha selebrasaun misa ba Mahein Parókia Motael St. António, iha igreja Motael, kinta ne’e.

Entretantu, Don Virgílio hatutan, bainhira ko’alia kona-ba sai naroman, Nai Jesus Kristu mak naroman mundu nian. Lisaun eskolante sira nian atu kontinua la’ós halai mesa-mesak maibé la’o hamutuk ho nia mestre, Nai Jesus Kristu.

“Oinsá mak eskolante sira atu fó sasin naroman ida ne’e? Eskolante nia naroman eziste iha liafuan hahalok nian. Tan ne’e mak kompara karik ita-nia moris loro-loron, hanesan lámpada laiha pila nia sei labele lakan,” Bispu esplika.

Tan ida ne’e, nia dehan, alin oan sira ne’ebé atu simu krizma, tau iha nia neon. Labele ohin de’it maka tara krúz no taka liman maibé nafatin besik liu-tan no fó fatin ba Jesus Kristu iha moris.

St. António, Amu Bispu informa, husik hela rekomendasaun ne’ebé serve ba sarani sira hotu atu banati mak tenke halo orasaun. St. António dehan, bainhira ko’alia kona-ba orasaun hanesan relasaun ida domin nian ne’ebé lori ema ida atu konversa ho Nai Maromak, iha ne’ebé halo klamar ida hetan ksolok mai hosi Maromak.

“St. António fó hanoin mai ita orasaun presiza ambiente ida silénsiu ninian. La’ós tenke hadook án hosi barullu hotu maibé esperiénsia ida fó fatin iha ita-nia fuan,” nia subliña.

Amu Bispu hateten, St. António, doutór boot orasaun ninian ne’ebé sempre dehan bainhira sarani sira harohan (reza) presiza hahalok haat ne’ebé labele ta’uk. Bainhira harohan, primeiru, tenke loke ó-nia fuan fó konfiansa ba Nai Maromak. Bainhira harohan ó konversa ho Nai Maromak. Bainhira ó harohan aprezenta ba Maromak ó-nia presiza. Bainhira ó harohan ó hahí no hanai Maromak. Tuir St. António nia hanoin, domin Maromak nian mak abut no hún ba moris espirituál sarani ida-nian. Segredu milagre ninia iha orasaun.

“Se ita hakarak loos atu haree Maromak nia milagre loro-loron iha imi-nia moris, haka’as-án ba abut metin ba Nai Maromak no hatene reza. Orasaun maka bele lori solusaun barak ba ita-nia família no sosiedade. Ohin loron problema barak ne’ebé mosu iha famíia, ita-nia rain, karik mós ita-nia deseiju buka Maromak, deseiju atu reza. Liliu ba joven sira, ho sakramentu krizma ne’e, sai tan pasu ida ba imi hakat ba oin sai joven ida ne’ebé hatene duni hili no halo buat ne’ebé loos nu’udar foinsa’e Katólika. Foinsa’e Katólika, foinsa’e ne’ebé hadomi ita Nai Jesus Kristu nia doutriña,” tenik Bispu.

 Jornalista: Cancio Ximenes

 Editór: Xisto Freitas

HAKEREK NO HATÁN

Please enter your comment!
Please enter your name here