Mapa eskola iha RAEOA. Imajen hosi portál zeesm.tl.

DILI, 12 juñu 2019 (TATOLI) – Ekipa Sindikatu Profesór Timor-Leste (ESPT) no Sindikatu Profesór Rejiaun Administrativa Espesiál Oé-Cusse Ambeno (RAEOA) na’in 15 hasoru malu ho Primeiru-Ministru (PM), Taur Matan Ruak hodi relata problema edukasaun iha RAEOA ne’ebé ekipa ne’e konsidera difikulta prosesu aprendizajen iha rejiaun ne’e.

Prezidente Sindikatu Profesór Timor-Leste, Francisco da Costa Soares informa katak enkontru ohin nu’udar oportunidade hodi hasoru malu ho PM atu bele haruka karta ba autoridade RAEOA, nune’e bele rezolve problema edukasaun hamutuk ho profesór sira iha RAEOA.

“Husu suporta husi Governu sentrál, oinsá atu fó hanoin ba parte RAEOA atu implementa no aplika lei hodi profesór sira bele sente saida mak sai iha edukasaun, liu-liu lei edukasaun ba profesór iha Oé-Cusse, tenke ezekuta lei ho di’ak hodi bele aplika ba sira-nia moris,” tenik prezidente sindikatu ba jornalista sira iha Palásiu Governu, kuarta ne’e.

Nia haktuir, liu-liu iha prosesu implementasaun rejime karreira ba profesór sira iha RAEOA, durante ne’e la’o ona iha prosesu pagamentu retroativu maibé RAEOA seidauk implementa.

Parte seluk mós nia akresenta, oras servisu ne’ebé tuir loloos lei baze edukasaun, hanorin 24 horas ba kada semana maibé iha RAEOA aplika 40 oras ba kada semana.

Tuir profesór ne’e, lei define iha 16 oras atu aplika kualker atividade saida de’it mak iha relasaun ho kna’ar profesór sira, maibé la-define fatin katak tenke iha eskola maibé iha RAEOA temi profesór sira sai hanesan Ajente Administrasaun Públika iha eskola para fila iha oras serbisu hahú tuku 08 to’o 16:30.

Nune’e mós nia dehan, kona-ba implementasaun lei ba rejime remota no kapitál ne’ebé aplika ba profesór sira maibé durante ne’e profesór sira iha RAEOA la-sente katak sai hanesan parte ida implementa lei ne’e ba sira-nia moris iha RAEOA.

Nia mós akresenta, dalaruma iha atrazu iha saláriu bele to’o fulan rua no tolu hodi bele hetan diretu salariál maibé iha tempu hanesan profesór sira hala’o kna’ar nafatin.

“RAEOA sai parte ida que profesór sira hamriik ketak no Prezidente Autoridade Munisípiu ho ninia estrutura tomak hamriik ketak no nunka mais atu bele hasoru malu no hetan solusaun, entaun ida ne’e mak intensaun profesór sira mai atu bele fó hanoin ba Primeiru-Ministru hodi fó hanoin ba RAEOA para rezolve problema no iha solusaun iha tempu badak”.

Parte seluk Reprezentante Sindikatu Profesor Rejiaun Administrativa Espesiál Oé-Cusse Ambeno (RAEOA), Carlos de Fátima Almeida lamenta ho situasaun edukasaun ne’ebé akontese iha RAEOA.

“Ami nu’udar profesór sente Oé-cusse lakon inan no aman ne’ebé mak laiha atensaun ba profesór sira tomak nia vida,” nia dehan.

Profesór ne’e reforsa, hahalok ne’ebé akontese ba profesór sira afeta mós ba oan sira hanesan estudante ne’ebé mak durante ne’e hafoin ezame trimestre dahuluk to’o agora.

“Profesor sira labele hala’o kna’ar ho di’ak tanba problema ne’ebé mak profesór sira iha RAEOA enfrenta seidauk hetan solusaun hanesan buat ne’ebé mak Sr. Arsenio Bano ko’alia iha mídia katak asaun profesór 800 resin ne’e agora rezolvidu ona,” haktuir nia.

Hodi hatutan: “Ami sente la-satisfás hodi buka meiu to’o iha ne’e, husi ekipa 15, mai iha ne’e atu hasoru direta ho Ministra Edukasaun ohin no kontinua ho Primeiru-Ministru”.

Nune’e, iha tempu badak Governu sentrál sei ko’alia di’ak ho Autoridade RAEOA ho ninia estrutura atu bele buka solusaun ba problema sira ne’ebé profesór sira enfrenta iha Oé-cusse.

Lee mós notísia: http://www.tatoli.tl/2019/05/pagamentu-ba-profesor-sira-raeoa-rezolvidu/

http://www.tatoli.tl/2019/04/profesor-800-iha-raeoa-manifesta-direitu-ba-salariu-fulan-marsu/

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here