Ofisiál Polísia Nasionál Timor-Leste bainhira partisipa iha seremónia aniversáriu PNTL ba dala 19 iha Sentru Formasaun Akademia Polísia Comoro, 27 marsu 2019. Imajen Tatoli/ António Gonçalves

DILI, 12 juñu 2019 (TATOLI)Membru Polísia Nasionál Timor-Leste (PNTL) na’in 100 no membru FALINTIL-Forsa Defeza Timor-Leste (F-DTL) tuir planu sei partisipa iha misaun dame iha Organizasaun Nasaun Unida (ONU).

Oras ne’e dadaun, Komandu PNTL koordena ho ekipa ONU ne’ebé oferese vaga 100 ba membru PNTL atu konkore ba vaga refere.

Ministru Defeza no Ministru Interiór Interinu, Filomeno da Paixão de Jesus dehan, governu apoia atu PNTL no F-FDTL hola parte iha misaun ONU nian.

Nia dehan, Komandu F-FDTL koopera ho Forsa Armada Portugal no Austrália mós fó hela formasaun ba membru F-FDTL balun  iha área inglés no portugeé nian  hodi priénse vaga ne’e.

“Iha Metinaro, Portugés no Australianu sira treina hela ita-nia forsa sira atu hola parte iha misaun ONU nian,” tenik Ministru Filomeno ba jornalistas sira iha Palásiu Governu, Dili, ohin.

Nia hatutan, ohin loron partisipasaun PNTL no F-FDTL halo misaun iha ONU ho númeru ne’ebé ki’ik kompara ho nasaun seluk, maibé ba futuru bainhira Timor-Leste iha kondisaun bele prepara forsa ho másimu (pelutaun ida) halo misaun iha ONU.

“Ba ha’u-nia hanoin, ita-nia (forsa) másimu pelutaun ida, maibé agora ita-nia forsa sei mínimu,” Filomeno haktuir.

Ministru Filomeno hatutan, vaga ne’e ONU fó iha área oioin, tanba ne’e governu sei halo estudu koopera mós ho Komandu PNTL no F-FDTL.

Antes ne’e, Xefe Koordenadór ba Kooperasaun no Relasaun Internasionál PNTL, Inspetór Xefe Augusto Tilman da Costa  liuhusi mídia PNTL esplika katak vaga ne’ebe ONU oferese hamutuk 100  hodi koloka ba serbisu ho polísia nasaun seluk iha ONU hodi tulun dame iha nasaun sira ne’ebé infrenta konflitu hanesan iha Sudaun Súl,Áfrika Sentrál, Darfur no seluk-tan.

Tuir planu, iha primeira semana fulan jullu mai ne’e, ekipa hosi ONU sei mai halo teste ba kandidatu sira kona-ba língua inglés, lori karreta, tiru no ramata ho entrevista.

Bainhira kandidatu sira pasa hotu hosi kritéria hirak ne’e mak lista naran haruka ba Komandante Jerál PNTL, hafoin ba Ministru Interiór no ba Ministériu Negósiu Estranjeiru depois haruka ba Misaun Permanente Nova Yorke hodi haruka ba ONU.

Hafoin teste ramata, kandidatu na’in ualu (8) ne’ebé pasa sei ba kedas Sudaun Súl atu hala’o misaun manutensaun dame no kandidatu seluk ne’ebé pasa naran tama iha lista rezerva nune’e bainhira ONU presiza bele haruka ba tuir pedidu.

Kritériu prinsipál ba vaga ne’e mak hanesan mínimu diviza ajente xefe, serbisu iha PNTL tinan 10 resin ona no laiha problema disiplina no krimi.

Iha loron hirak liu-ba, ba Agência Tatoli, Komandante Jerál PNTL, Komisáriu Faustinho da Costa husu ba kandidatu sira atu aproveta didi’ak tempu hodi tuir vaga ne’e reprezenta PNTL halo misaun iha ONU.

Tuir nia, liuhosi partisipasaun PNTL iha ONU bele aumenta membru PNTL sira-nia koñesimentu no bainhira misaun ramata bele mai dezenvolve fali instituisaun PNTL la’o ho profisionalizmu.

 

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here