Vise-Ministru Saúde Bonifácio Maukoli dos Reis. Foto António Goncalves

DILI, 12 juñu 2019 (TATOLI) – Governu liuhusi Ministériu Saúde (MS) halo hela esforsu hodi redús moras kontajioza iha Timór-Leste, ho maneira hametin sistema saúde primária.

“Polítika redús moras kontajioza maka oinsá hametin sistema saúde primária, liuliu promosaun, fó edukasaun, nune’e povu iha konsiénsia muda hahalok, hanesan tenke hariis moos no konsumu hahán saudavel”,  hateten Ministru Saúde Interinu, Bonifácio Maukoli dos Reis, ba TATOLI iha Palásiu Governu, ohin.

Ministru Saúde Interinu hateten daudaun ministériu saúde liuhusi sistema informasaun saude rejista moras sira, hodi identifika loloos moras ne’ebé mak aas.

Governante ne’e haktuir: “Moras ne’ebé daudaun ne’e ministériu saúde liuhusi sistema informasaun saúde, moras hot-hotu hosi sistema ne’e rejista moras 10, aas liu maka infesaun via-respiratóriu, infesaun kulit, no tuir maka diarreia”.

Moras hirak ne’ebé rejista, Bonifácio subliña ai-moruk iha sentru saúde, postu saúde no ospitál sira sufisiente atu fó tratamentu ba komunidade.

Nia subliña sistema rejista saúde eletrónika daudaun ne’e sei paradu, tanba ne’e sei rejista de’it ho sistema manuál.

“Sistema rejista saúde eletrónika paradu, maibé daudaun ne’e loke ona vaga ba públiku hodi kompañia sira konkorre, nune’e bele re-ativa hikas sistema eletrónika, daudaun ne’e rejista manuál de’it”, katak nia.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here