Diretór Isílio Coelho. FOTO: MNEK

 DILI, 12 juñu 2019 (TATOLI)-Governu liuhusi Konsellu-ministru aprova ona akordu izensaun vistu ba pasaporte diplomátiku no servisu ba titulár entre Timor-Leste no Reinu Kambodia, ne’ebé asina ona husi Ministru Negósiu Estranjeiru no Kooperasaun (MNEK), Dionísio Babo Soares, iha loron 19 agostu 2016, objetivu atu fortalese no haforsa liután relasaun amizade no kooperasaun entre Timor-Leste ho Kambodia.

Diretór Jerál Asuntu Bilaterál, Isílio Coelho informa katak akordu izensaun vistu entre Timor-Leste no Kambodia ne’ebé aprovadu ona husi Konsellu-ministru sei submete fila fali atu hetan rezolusaun hodi publika.

“Submisaun ne’e dala rua, ida submete para aprovasaun asinatura, ida fali submete para publikasaun, nune’e primeira faze loos ona, asina ona. Ne’ebé, agora ita hein de’it fali atu hatama rezolusaun para publika ninian,” hateten Diretór Isílio Coelho ba Ajénsia TATOLI iha nia kna’ar fatin, Praia dos Coqueiros, kuarta (12/06).

Iha fatin hanesan, Diretór Jerál Asuntu Bilaterál ne’e mós informa, agora daudaun MNEK tenta haree akordu kona-ba vistu ba pasaporte diplomátiku no servisu ne’e ho país parseiru sira ne’ebé presiza hanesan Kambodia, Laos, Vietname tanba tuir diretór ne’e katak nasaun tolu ne’e presiza iha vistu mak foin bele tama.

“Entaun atu evita ida ne’e, liuliu ita haree katak sira-nia embaixada iha Timor-Leste mós laiha, agora haree katak ita presiza vistu maka ita ba, pois ita atu presiza vistu mós ladún fasil ba ida, tanba ne’e presiza halo tiha akordu ida hodi bele fasilita vizita resíproka entre nasaun sira ne’ebé halo akordu ne’e”.

Maibé, tuir Diretór Isílio Coelho katak akordu Timor-Leste nian ho Kambodia asina ona husi Konsellu-ministru, nia prosesu ne’e primeiru iha aprovasaun asinatura governu, pois iha relasaun finanseira tanba ne’e tuir diretór ne’e dalaruma sei ba to’o iha Parlamentu Nasionál (PN).

Mas prontu ha’u fiar katak izensaun vistu ne’e la presiza ba to’o iha Parlamentu Nasionál uma vez aprovadu ona husi Konsellu-ministru no asinadu husi governu publika finál loos ona,” dehan Diretór Isílio Coelho.

Diretór Jerál Asuntu Bilaterál, Isílio Coelho informa tan katak akordu ho Vietnam sei negosia hela, nune’e submisaun ba primeiru-ministru sei pendente hela tanba iha prosesu tékniku oituan ne’ebé mak seidauk finaliza.

“Nune’e fulan ida ne’e ka fulan oin maka bele finaliza atu bele hatama ba Konsellu-ministru para hetan konsiderasaun no aprovasaun asinatura, hafoin halo fali segunda faze rezolusaun ba publikasaun, pois entra vigór. Prosesu hanesan mós sei aplika ba Myanmar,” konklui Diretór Isílio Coelho.

Jornalista       : Nelia Rosario

Editór             : Rafy Belo

HAKEREK NO HATÁN

Please enter your comment!
Please enter your name here