Ministru Defeza no Ministru Interiór interinu, Filomeno da Paixão de Jesus. Imajen/António Gonçalves

DILI, 12 juñu 2019 (TATOLI)Ministru  Defeza no Ministru Interiór Interinu, Filomeno da Paixão de Jesus  husu ba Polísia Nasional Timor –Leste (PNTL) atu investiga kle’an kazu ema deskoñesidu na’in rua tá kanek oknum ajente polísia Inácio de Carvalho (26) iha área Eskola 30 Agustu, Aldeia Anin Fuik, Suku Madohi, Postu Administrativu Don Aleixo, Munisípiu Dili.

Ajente polísia ne’e hetan tá iha loron segunda (10/06) liu-ba iha tuku sia (9) kalan bainhira mai hosi Maliana-Bobonaro iha ne’ebé to’o iha Rotunda Comoro autór rua ho motór falun oin metin tuir kedas vítima ho nia motór hodi hasai sasán kro’at lansa tá ba vítima iha motór leten rezulta polísia ne’e nia kotuk laran kuak no kanek boot.

“Ha’u husu polísia para bele investiga nia (ema deskoñesidu) ba tá kanek polísia ne’e tanba saida? Tenki investiga! Tanbasá mak ita-nia polísia sai fali alvu ba buat ida ne’e,” realsa Ministru Filomeno ba jornalista iha Palásiu Governu, Dili, ohin.

Nia lamenta ema sivíl halo asaltu lori kro’at tá kanek forsa Estadu nian, tan ne’e tenke buka hatene hodi kaer autór sira ne’e investiga no prosesa.

Filomeno apela ba ajente polísia hotu-hotu di’ak liu halo serbisu ba Estadu no labele mete iha kualker organizasaun arte marsiál.

“Ha’u husu ba PNTL liliu ajenta sira tuur halo serbisu. Labele mete iha arte marsiál tuun-sa’e. Ita-nia atitudI tenki imparsiál para ita la’o iha komunidade nia leet bele iha respeitu,” nia alerta.

Iha fatin hanesan, Komandante  Internu Polísia Munisípiu Dili, Superintendente Asistente, Euclides Belo dehan, vítima ajente polísia agora halo hela tratamentu saúde iha opsitál no parte polísia ivestigasaun no intelejénsia sira tuun ona iha terenu hodi rekolla informasaun no buka tuir autór na’in rua atu kaptura.

“Ita investiga hela no to’o tempu polísia sei kaptura sira,” dehan Euclides ba journalista bainhira aprezenta keixa ne’e ba Komandu PNTL, ohin.

Membru polísia ne’e hala’o nia kna’ar iha Komandu PNTL Maliana mai Dili ho objetivu atu vizita família (haree nia oan mane ne’ebé moras).

Komandante Euclides informa, polísia mós rekolla ona informasaun hosi parte hotu—hosi vítima rasik inklui sasin sira ne’ebé hela besik iha fatin akontesimentu, Comoro.

 

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here