Ministru Defeza no Ministru Interiór interinu, Filomeno da Paixão de Jesus. Imajen/António Gonçalves

DILI, 12 juñu 2019 (TATOLI)Ministru Interiór Interinu,  Filomeno da Paixão de Jesus dehan nia parte simu ona proposta estatutu no lei orgánika Komandu Polísia Nasionál Timor-Leste (PNTL) no oras ne’e nia sei estuda hela molok aprezenta ba Konsellu Ministru hodi halo diskusaun kle’an.

“Lei disiplinár agora foin to’o mai ha’u-nia liman. Ha’u sei haree no estuda. Se loos ona mak ha’u sei aprezenta ba Konsellu Ministru,” informa Ministru Interiór, Filomeno ba jornalista iha Palásiu Governu, Dili, ohin, relasiona ho antes ne’e ekipa Ministériu Interiór hamutuk ho Komandu PNTL forma ona ekipa konjunta hodi halo estudu kle’an, ho hanoin atu revee lejizlasaun sira iha PNTL hanesan lei orgánika, estatutu no mós regulamentu disiplinár ho objetivu profisionaliza membru PNTL sira.

Estudu ne’e, nia informa, sei aprezenta iha relatóriu finál ba governu konstitusionál da-ualu atu hamosu mudansa iha estrutura no delegasaun kompeténsia hahú hosi nasionál to’o munisípiu.

Prosesu estudu ne’ebé halo hosi asesór tékniku MI no asesór jurídiku sira iha PNTL, foku liu ba asuntu prioridade tolu ne’ebé konsidera importante hodi hadi’a serbisu tomak iha polísia bele serbisu ho profisionál no dixiplina mak; hadi’a lei orgánika, estatutu no regulamentu disiplinár PNTL nian.

Governu konsidera, asuntu prioridade tolu ne’e presiza hadi’a hodi fó valór pozitivu ba progresu dezenvolvimentu Komandu PNTL tuir Planu Estratéjiku Dezenvolvimentu Nasionál (PEDN) 2011-2030 hodi lori PNTL hakbesik liu-ba komunidade hodi garantia pás no estabilidade interna no esterna.

Hahú iha tinan 2000 to’o mai agora, PNTL hala’o nia kna’ar tuir Konstituisaun artigu 147 iha ne’ebé polísia nia kna’ar  atu defende legalidade demokrátika no garante seguransa interna ba sidadaun hotu no la inklina ba kualker grupu polítiku. Prevensaun krimi tenke bazeia ba respeitu direitu umanu.

Ho kna’ar hirak ne’e, iha 18 fevereiru 2009, Governu Timor-Leste hasai Lei Orgánika PNTL nian ida ne’ebé uza to’o ohin loron no Komandu PNTL rasik to’o agora seidauk iha Estatutu Própriu.

Nune’e, hahú iha tinan 2015 nia laran, Komandu PNTL harii ona ekipa independente ne’ebé involve Governu hodi prepara estatatu PNTL foun inklui lei orgánika PNTL no revee Regulamentu Disiplinár ne’ebé sei aumenta artigu balun hodi fó kompeténsia ba Departamentu Justisa atu uza regulamentu foun sira sai “nehan” kro’at ida ba Departamentu Justisa hala’o kna’ar no ezekuta misaun sira ne’ebé iha relasaun ho justisa no kestaun disiplinár sira tenke tuir nórma sira Konstituisaun nian.

Lei no diretiva sira ne’ebé vigora iha Repúblika Demokrátika Timor-Leste nia territóriu laran, hanesan artigu 2, 16 to’o 28, no Artigu 31 no artigu 147 hosi Konstituisaun RDTL, Dekretu-Lei 9/2009 (Lei Orgánika PNTL nian) no Dekretu-Lei Nú. 13/2004 (PNTL nia Regulamentu Disiplinár).

Regulamentu foun sei fó kompeténsia hala’o investigasaun ba kazu sira ne’ebé iha natureza disiplinár hasoru membru PNTL sira ne’ebé serbisu iha Kuartél Jerál PNTL nian ka iha unidade ka serbisu sira ne’ebé laiha Seksaun Justisa. Hala’o mós investigasaun ba kazu sira ne’ebé iha natureza disiplinár ne’ebé, tanba sira-nia gravidade, sensibilidade ka urjénsia, iha potensialidade atu halo fo’er PNTL nia imajen institusionál ka satan instituisaun ne’e atu hala’o nia misaun.

Aleinde ne’e, Komandu PNTL sei haforsa serbisu Unidade Patruliamentu Fronteira (UPF) no Serbisu Ofisiál Polísia Suku (OPS) liuhosi hadi’a kondisaun infraestrutura no kapasita rekursu umanu no fasilidade serbisu.

Komandu PNTL hato’o ona proposta ba governu liuhosi Ministériu Interiór atu muda naran Unidade Polísia Marítima (UPM) ba Unidade Seguransa Kosteira (USC-sigla portugés) no hamosu tan Departamentu Tránzitu Kontrolu Auto Estrada (UDTKAE) no Unidade Frauda Fiskál (UFK).

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here