Primeiru-Ministru, Taur Matan Ruak kaer liman ho Xefe Estadu Maiór Jenerál F-FDTL, Majór Jenerál Lere Anan Timur. Imajen/Dok.Media PM

DILI, 12 juñu  2019 (TATOLI)-Xefe Estadu Maiór Jenerál FALINTIL-Forsa Defeza Timor-Leste (F-FDTL, sigla portugés), Majór Jenerál Lere Anan Timur, iha tempu besik, sei aprezenta lista veteranu 400 ba Governu hodi bele tau matan ba sira nia kondisoens moris.

Lista veteranu na’in 400 versaun Komandante Sub Xefe Estadu Maiór FALINTIL, Lere Anan Timur nian ne’e, sei entrega diretamente ba Primeiru-Ministru, Taur Matan Ruak, ne’ebé mós nu’udar Komandante FALINTIL ida.

Intensaun hosi Lere Anan Timur nian hodi aprezenta lista veteranu ne’ebé luta durante tinan 24 nia laran, inklui lubun ida ne’ebé militár indonézia kaptura ne’e ba Governu atu husu Governu tau matan ba sira no harii uma ne’ebé dignu ba sira.

“Lista ne’e purvolta 200 resin, maibé konta  sira ne’ebé uluk inimigu kaptura bele to’o 400,” informa Majór Jenerál, Lere Anan Timur ba Jornalista sira hafoin diskute preokupasaun ne’e ho Prezidente Repúblika, Francisco Guterres Lú Olo, ohin, iha Palásiu Prezidensiál,  Dili.

Lere sente preokupa ho kondisaun moris veteranu balun nian ne’ebé “vulneravel’ tebes no hirak seluk ne’ebé reforma hosi instituisaun F-FDTL laiha uma hela fatin hodi kontinua hela hamutuk ho família.

“Primeiru tenke halo uma tanba uluk ami hela iha fatuk ko’ak, maibé agora tenke hela iha uma di’ak ida ba ami,” afirma Lere Anan Timur.

Lista ne’ebé Lere sei aprezenta laiha falsifikasaun, maibé justu no loloos kompara ho lista Komisaun Omenajen nian ne’ebé rejistu Veteranu barak liu.

“Ami veteranu ho dedikasaun tinan 24, purvolta ema na’in 98, konta ho sira levantamentu másimu 200,” tenik Lere Anan Timur.

Lere hateten, maske veteranu sira simu pensaun kada fulan $250, maibé montante la sufisiente atu sira uza hodi harii uma.

Relasiona ho preokupasaun ne’e, Sekretáriu Estadu   ba Asuntu Kombatente Libertasaun Nasionál, Gil da Costa Monteiro ‘Oan Soru’ hatete, seidauk iha lei maka define atu halo verifikasaun ba veteranu hira maka seidauk iha uma. Maibé, Governu konsidera preokupasaun ne’e.

“Ha’u seidauk iha lista veteranu nain hira maka laiha uma, maibé realidade veteranu la iha uma,”  hateten Gil “Oan Soru”, horiseik.

Jornalista      : Agapito dos Santos

Editór            : Francisco Simões

HAKEREK NO HATÁN

Please enter your comment!
Please enter your name here