Membru Parlamentu Nasionál Hosi Bankada KHUNTO, António Verdiál.

DILI, 12 juñu 2019 (TATOLI)– Membru Parlamentu Nasionál (PN) hosi Bankada KHUNTO, Antonio Verdial, husu ba juventude timoroan sira tenke halo parseria di’ak ho autoridade Polisia Nasionál Timor-Leste (PNTL) atu labele hamosu problema.

“Ha’u laran la haksolok uainhira juventude sira halo asaun hasoru polisia. Ida ne’e krime. Loloos ne’e, joven sira tenke halo parseiru di’ak ho polisia atu labele iha problema,” hateten Deputadu  Antonio Verdial ba jornalista sira iha PN, ohin, hodi hato’o nia lamentasaun kona-ba kazu joven deskoñesidu ne’ebé taa kanek ajente PNTL ida iha área Eskola 30 Agostu, Dili.

Nia mensiona katak, ema ne’ebé hakarak halo krime tenke responsabiliza ba nia aktu tanba krime ka kazu sivíl nia na’in maka Ministériu Públiku.

“Polisia sente violadu tenke submete ba Ministériu Públiku atu bele defende direitu ne’e,” esplika Antonio Verdial.

Ajente PNTL ne’e taa iha segunda (10/06), tuku 21:00 Otl, bainhira nia mai hosi Maliana, maibé to’o iha Rotunda Comoro, autór rua ho motor ne’ebé falun oin tuir kedas vítima hodi hasai sasán kro’at no taa ba vítima iha motor leten.

Jornalista      : Zezito Silva

Editór             : Francisco Simões

HAKEREK NO HATÁN

Please enter your comment!
Please enter your name here